Realizasaun vasina ba EhD, Sábdu ohin (24/4) ne’e bazeia ba pedidu Asosiasaun Defisiensia Timor-Leste (ADTL) ba Ministériu Saúde atu asegura Ema ho Defisiensia, liu-liu ema hirak ne’ebé konsidera iha liña frente.
Diretór Exekutivu Asosiasaun Defisiensia Timor-Leste (ADTL), Cesario da Silva hatete, ekipa liña frente husi EhD ne’e hamutuk ema na’in 50, kompostu husi feto na’in 20 no mane na’in 30.
Ekipa hirak ne’e ekipa liña frente tanba sira hala’o hela atividade atendementu ba Ema ho Defisiensia sira.
Nia hatutan, Ema ho Defisiensia hotu ne’ebé halo vasina ne’e mai husi tipu defisiensia hotu hanesan, defisiensia matan, defisiensia tilun no defisiensia fiziku.
Sira ne’e iha baze hodi hasoru direita Ema ho Defisiensia sira no hasoru direita komunidade defisiensia sira iha terenu.
Nune’e apoiu hirak ne’ebé sira halo mak agora dadauk halo hela intervensaun emerjensia iha situasaun Covid-19.
Aliende ne’e, sira mós ba sosializa, iha situasaun kalamidade ne’e, sira apoiu mós nesesidade baziku ba Ema ho Defisiensia sira.
“Sira hotu hola parte iha liña frente tanba ne’e ami husu atu hetan uluk vasina atu halo prevensaun ba sira nia an rasik. Ami kordena nafatin hodi haree tan ba faze daruak tuir mai, tanba organizasaun defisiensia ne’ebé tau matan ba Ema ho Defisiensia ne’e iha 22,” dehan nia iha ambitu serimonia vasinasaun iha fatin ADTL, Maskarenhas-Balide Dili.
Husi numeru ne’e sei iha tan ema hirak ne’ebé konsidera hanesan liña frente.
Iha fatin hanesan, Diretor Exekutivu East Timor Blind Union (ETBU), Umbelino Desterro Cruz da Costa, hatete, hanesan sidadun Timor-Oan iha obrigasaun halo tuir regras Ministeriu Saúde nian, atu proteze an husi moras oin-oin, liu-liu ba moras Covid-19.
“Ha’u simu vasina ne’e bainhira aimoruk ne’e tama ha’u senti hanesan kabas ne’e todan, maibé agora ha’u iha kondisaun diak hela, parese ha’u nia imunidade forte hela nune’e reajem ne’e seidauk”.nia dehan.
Entretantu, Diretor Exekutivu Raes Hadomi Timor Oan (RHTO), João Zito dos Santos hatete, iha tersa semana kotuk RHTO nia membru ne’ebé konsidera hanesan liña frente hamutuk na’in 47 mós simu ona vasina AstreZeneca.
Ho nune’e dadus jeral Ema ho Defisiensia iha teritoriu laran tomak hamutuk rihun 38.118.
Jornalista:Saturnina da Costa
Editor:Jose Sarito Amaral
