Hanesan iha merkadu Manleuana, vendedór sira hadau malu fa’an fatin, tanba vendedór balun aproveita Estadu Emerjénsia ne’e hodi okupa fatin hafoin vendedór seluk taka nia atividade bainhira deklara Estadu Emerjénsia.

Natalina Agusta Agusta Martins nuudar negosiante ne’ebé fa’an obralan hatete, hahú husi fulan-Marsu nia kumpri regra Estadu Emerjénsia hodi taka nia kios durante fulan ida. Bainhira remata periodu Estadu Emerjénsia dahuluk nia fila hikás ba nia fatin hodi fa’an, maibé nia fa’an fatin oin negosiante sira seluk taka tomak dalan.

“Ha’u hatete sira imi sai tiha husi ne’e par fatin iha ha’u mós fa’an ha’u nia sasan tanba ha’u araska, ha’u nia osan laiha, ha’u hamlaha ona, agora fulan tolu nia laran ona ha’u nia oan sira, ha’u ami uma laran sasan laiha ona ne’ebé ha’u mos hakarak fa’an,”dehan Natalia ba INDEPENDENTE Online, segunda (04/05).

Negosiante ne’e hatutan, nia maluk sira ne’ebé fa’an modo iha nia fatin negosiu oin durante fulan-Marsu nia laran sira la ba uma husi dader too lorokraik. Tanba ne’e, nia husu atu bele sai husi fatin atu bele fó fali fatin ba nia hodi halo negosiu.

Iha sorin seluk, Negosiante Gilda Madeira Gonsalves hatete, ninia moris depende de’it ba fa’an modo tanba nia kaben nuudar badaen ne’ebé labele halo buat ida iha situasaun Estadu Emerjénsia

“Durante Estadu Emerjénsia ami nia moris mak depende ba fa’an modo ne’e de’it. se ohin ema hola modo entaun ohin ami han se ema la hola entaun ami la han ida,”dehan Gilda ba INDEPENDENTE Online, iha merkadu Manleuana, Segunda (04/05).

Gilda ne’e mós preokupa kona-ba politika rai laran nian. Negosiante ne’e hatete, bainhira situasaun rai laran kontinua la normal tanba lidera sira la hamutuk, nia nuudar negosiante kiik ho nia laen nuudar badaen sei afeita ba sira nia moris liliu ba oan sira.

“Sorti iha situasau emerjénsia labarik sira mós la eskola se labarik sira mos eskola tan araska liu osan selu bemo atu mai husi ne’ebe atu han de’it mos susar,”tenik nia ho triste.