"Ita aprezenta proposta adisional hamutuk millaun $50 liu, millaun $32 para sosa mina sentral ba oliopezadu Hera no Betanu, Millaun$9 ba solar PV jeladores no batria ba Atauru, Millaun $6 ba kabu subteranu estrada protokolu sira iha Dili laran, no Millaun $10.8 bá operasaun manutensaun eletrika hodi selu ba Kompañia Wartsila, tanba ezekusaun orsamentu 2025 atinje 30%, maibé se ita liga ho obrigasaun ne'e bele liu 70%. Tanba kontratu hotu-hotu ita hein selu de'it, bainhira ema fornese mina mai," deklara Prezidenti Ezekutivu EDTL, E.P, Paulo Alves, ba jornalista sira iha resintu Ministériu Finansas Aitaraklaran, Sábadu (09/08).
Nia esplika, osan ne'ebé sai husi EDTL nia reseita besik 30%, kompostu husi manutensaun, projetu eletrifikasaun, projetu rurál no operasaun saláriu vensimentu.
"Ita bele garante to'o fulan dezembru bele ezekuta to'o 90%, maib’e depende bá ita nia parseiru sira hanesan, Kompañia sira-ne'ebe implementa obra, se sira halo hotu lalais no hatama faktura invoice mai bele halo pagamentu," nia haktuir.
Nia hatete, iha nivel suku populasaun asesa linã eletrisidade atinje ona 100%, ne’eb’e identifika 85% mak asesu ona eletrisidade, hela de'it 15% mak seidauk asesu.
"Entaun iha fulan kotuk ita konklui tiha ona suku ikus iha Betulau Likidoe, Aileu nune'e ami kompleta ona 100% iha nivel suku, hela nivel aldeia 186 maka seidauk asesu, tanba ne’e aldeia 186 ne'e ita iha kedas programa dezeñu no BIOQ kompletu tiha ona, iha fulan agostu nia rohan sei halo prosesu aprovizionamentu hodi finaliza iha fulan ikus tinan ne'e selebra kontratu no tinan oin Kompañia sira hahú implementa ba instalasaun konstrusaun" nia subliãna.
"Ita-nia tarjetu iha 2026 ema iha aldeia hotu-hotu bele asesu ona ninia neuzelar eletrika, tanbá ita atu hasa'e rasio eletrifikasaun nasional, iha nivel aldeia nian maka ita tau 186 aldeia ne'e atu rezolve iha 2026 ho orsamentu Millaun $18 liu," nia argumenta.
Tanbá ne'e ba oin EDTL sei halo kontrola ba kliente sira-ne'ebe uza kontador ilegál, atu konsimodor sira bele kontribui reseita, se lae aumenta despeza.
"Entaun sira sunu mina gasta kustu barak loos, sira tenke uza kontador legal hodi kontribui manutensaun, sela'e tinan-tinan Estadu hasai kuantidade osan boot tebes, tanbá ne'e ita tenke minimiza," nia haktuir.
Nia dehan,EDTL kontinua halo inspesaun rutina ba komunidade sira-ne'ebe halo ligasaun kontador direta ho ilegalmente sei fó multa ho monta kontadores foun.
"Ami identifika barak loos bainhira EDTL hahú halo nia operasaun, no identifika kuaze 75.000 maka ligasaun direta husi kontador ilegal, entaun ita sosa fali kontador hamutuk 108.000 hodi halo instala ba komunidade sira iha timor laran tomak, ne'e mak ita haree reseitas sa'e uitoan," nia akresenta.
Tanbá ne’e EDTL husu ba ema hotu atu labele halo ligasaun ilegal, enkuantu detekta sei penaliza tuir dekretu lei númeru 33/2016 17 Agusto kona-ba regula enerjia no tarefa eletrisidade.
