Prezidente KSTL Almerio Vilanova hatete, kazu 102 ne’e mai husi setor oioin hanesan, setor komersiu iha kazu 44, setor industria iha kazu 16, setor konstrusaun kazu 23, setor otelária kazu 10, setor serbisu privada iha kazu 8, no traballador doméstiku kazu 1.

Kategoria ba kazu hirak ne’e, nia dehan, kategoria hapara serbisu hamutuk kazu 27 ne’ebé envolve trabaladór na’in 45, kategoria salariu nian hamutuk kazu 59 ne’ebé envolve trabaladór na’in 240, no kategoria kondisaun serbisu hamutuk kazu 5 ne’ebé envolve trabaladór 68.

Aleinde kazu ne’e, Almerio hatutan, iha mós kazu inan isin-rua ne’ebé lisensa ba partus maibé bainhira tama fali serbisu kompaña nain la simu ona.

Kazu seluk, nia dehan, mosu ameasa husi komunidade balun ba trabaladór ne’ebé nia patraun obriga atu serbisu nafatin iha period estadu emerjensia.

“Implementasaun (EE) foufoun ne’e ema hotu iha uma maibé kompaña barak mak obriga nafatin nia traballdor sira tenke servisu, entaun iha traballador balun la’o ba servisu maibé iha komunidade balun mak sei impede iha dalan, atu baku, ho reasaun fiziku hodi hasoru sira, ne’ebé kazu ida ne’e rejistu hamutuk 5,” dehan Almerio ba jornalista sira iha salaun FONGTIL, Kaikoli, Tersa (19/05).

Kona-ba prosesu simu keixa durante EE, Almerio dehan, KSTL estabelese hotline hodi fasilita trabaladór sira ne’ebé hasoru problema no mós fasilita prosesu mediasaun entre trabaladór ho kompaña nain.

“Ami halo komunikasaun direita ho parte empregadór sira atu nune’e bele hetan nia solusaun tuir lei, maibé kuandu grave liu entaun ami tenke rejistu de’it depois mak simu kazu sei haree fila fali hodi fó oportunidade iha loron seluk hodi bele hamutuk ho empregador fó solusaun.”

Ho esforsu ne’ebé iha, nia dehan, husi total kazu ne’ebé rejistu, KSTL konsege rezolve ona kazu 35.