Reprezentante Diretór DNPKK, Julião Fernades, hateten, sensibilizasaun sensivel ba jéneru no feto ba pás autoridade lokal sira atu hakbiit koñesimentu hodi kontribui ba pás, estabilidade no prevene konflitu iha sosiedade.
Nia dehan, aktidade desimenisaun ne’e bazeia ba aprova Decreto Lei No.47/2020 konaba Matadalan Mediasaun sensivel ba Jeneru, tanba ne’e DNPKK hahú fahe esbosu matadalan ba liña ministeriais hitu (7), hanesan Ministeriu Justisa (MJ), Defensoria Publiku, MSSI, MAE, PDHJ, PNTL, MI inklui ONG Belun, iha tinan 2020 nia rohan no kontinua diskusaun ba harii rede nasional mediasaun iha TL.
Tanba ne’e, SEPS liu husi DNPKK kontinua fó treinamentu ba mediador Nasional husi liña ministeriais 7 inklui Organizasaun Belun iha semana kotuk no kontinua expanda ba Mediador, pratisionariu/ harii dame nain iha nivel suku inklui KPK no OPS.
“Ita nia autoridade lokal sira mak sai autór atu lori pás no estabilidade ba sosiedade nia leet, tanba ne’e ami aprezenta matadalan sensivel ba jéneru no feto ba pás hodi konsensializa ita nia autoridade lokal atu kontribui ba pás no estabilidade iha sosiadade nia leet,”dehan nia iha salaun sentru Tokodede, Likisa, kuarta horseik (20/10).
Nia dehan, Objetivu sensibilizasaun ne’e atu hakbiit koñesimentu ba autoridade sira hodi hamutuk ho ema hotu nia partisipasaun liu liu ema vunerável atu harii pás, estabilidade no prevene konflitu iha komunidade.
Nia afirma, tuir dadus, hahú husi janeiru to’o agostu tinan 2021, DNPKK rejista kazu foun hamutuk 295 husi teritóriu Timor laran no kazu neebé prosesa hela husi tinan 2020 too 2021 iha 134 ho arkivu ka rezolvidu liu husi prosesu mediasaun hamutuk 196, ne’ebé ho autór no vitíma iha mane 452 no feto 132.
Enkuantu, kazu sira-ne’e, mediadór sira simu husi komunidade hodi fasilita deit mediasaun too parte simu malu, hodi komprometidu sei la kria tan konflitu no prontu kontribui ba estabilidade iha sosiedade.
Iha fatin hanesan Adjuntu Autoridade Munisipiu Likisa, Antoninho da Silva Pinto hateten, aktividade sensivilizaun konaba matadan sensivel ba jeneiru ida ne’e bele ajuda autoridade lokal hodi bele rezolve konflitu iha komunidade.
“Konflitu sempre akontese iha fatin barak, tanba ne’e liu husi dezamasaun matadalan sensivel ba jeneiru bele tulun ita nia autoridade munisipiu sira atu halo prevensaun ba konflitu iha sosidade,” hakotu nia.
Entretantu, aktividade dezaminasaun matadalan sensivel ba jeneiru sei halo durante loron rua iha Munisipiu Likisa, hahú iha loron 20 too 21 Outubru 2021 no parsitipante sira mai husi autoridade munisipiu Likisa, Ermera, Aileu no Ainaru inklui Ofisial, polisiamentu suku (OPS), iha salaun sentru Tokodede Munisipiu Likisa.
Aleinde, aktividade dezaminasaun matadalan sensivel ba jeneiru ne’e rasik hetan apoiu finaseiru husi parseiru UN Women ho osan rihun $60 ba prevensaun konflitu komunitariu iha Timor-Leste.
Asistente Editor: Saturnina da Costa
