Iha selebrasaun misa liturjia Domingo foin lalais (18/4) ne’ebé lao ona iha Igreja Katedral Santo Antonio Baucau no Igreja Colegio Fatumaca, bazeia ba anunsiu Bispo Dioseze Baucau Dom Basilio do Nascimento, liuhusi komunikadu Sabdu (17/4), hodi fó autorizasaun ba sarani sira bele ba fali misa.

Tanba tuir Bispo hatete, bazeia ba rezulusaun Governu ne’ebé fó autorizasaun hodi hapara konfinamentu obrigatoriu. Nune’e serka sanitaria mak nafatin vigor, no labele sai husi munisipiu ida ba munisipiu sira seluk.

“Ha’u mai fó hatene ba komunidade sarani sira hotu katak, ita nia selebrasaun liturjia no relijioza sira bele lao normal fali ona iha igreja sira,”dehan nia liu husi karta komunikadu ne’ebé Online Independete asesu iha loron sabado (17/04).

Ho nune’e Dom Basilio husu ba sarani sira atu nafatin tuir regras sira ne’ebé Organizasaun Saúde Mundial fó sai ona.

Atu nune’e labele fó biban ba moras Covid-19 bele hada’et no habarak-an liu tan iha Dioseze Baucau.

Maibé hafoin selebrasaun misa, sosiedade sira preokupa no konfuzaun ba reativasaun atividade relijaun kontrariu ho desizaun Konsellu Ministru nian ba regra serka sanitaria ne’ebé kontinua eziste iha Munisipiu Dili, Baucau no Vikeke too loron 2 fulan-Maiu 2021.

Bazeia ba desizaun Konsellu Ministru iha loron 14 fulan-abril tinan 2021, aprova ona projetu Rezolusaun Governu nian, ne’ebé kontinuasaun husi impozisaun serka sanitária iha Munisípiu sira hanesan Dili, Baukau no Vikeke to’o loron 2 fulan-maiu.

Rezolusaun ne’e, bandu sirkulasaun ema nian entre munisípiu sira-ne’e no sirkunskrisaun administrativa sira seluk, exetu iha kazu sira ne’ebé iha fundamentu forte tanba  razaun seguransa públika, saúde públika, asisténsia umanitária, manutensaun sistema sira abastesimentu públiku ka realizasaun interese públiku nian.

Iha rezolusaun ne’e, sei kontinua ho regra anterior, sei bandu movimentasaun ka atividade halibur ema barak liliu atividade relijaun.

Entretantu, tuir Ministru Presidensia Konsellu Ministru (MPKM), Fidelis Leite Magalhães hatete, ne’e kestaun tekniku laos kompétensia Governu nian. Governu ne’e politiku no foti desizaun politika hodi hamosu rezolsaun ida hodi ema hotu tenki kumpri dekretu Governu ne’e iha ambitu surtu Covid-19.

Tanba ne’e, nia husu ba Sentru Integradu Jestaun Krize (SIJK) nuudar responsavel ba tekniku atu fó atensaun ba Dioseze Baucau.

 “Tanba ne’e kona-ba serka sanitaria ne’ebé mak dadaun lao ne’e tuir rezolusaun governu nian, nunee Sala Situasaun Sentru Integradu Jestaun Krize mak koordena kona-ba nia implementasaun, hanesan nia lalaok sira iha terenu ne’e kabe ba kompetensia SIJK mak tenki asegura nia implementasaun sira,” dehan MPKM Fidelis ba jornalista, iha Palasiu Governu, Kurta(21/04/2021).

Porta-voz Governu ne’e afirma, Governu hanesan politiku so bele halo deit dekretu rezolusaun Governu nian, no parte tekniku sira hanesan SIJK mak kaer ba rezolusaun Governu nia hodi halo koordenasaun ho departamentu oin oin Governu nian hodi asegura medida implementasaun iha serka sanitaria ne’e.

Iha fatin ketak, Kordenadór Sala Situasaun Sentru Integradu Jestaun Krize (SIJK), Dr. Rui Maria de Araújo hatete, ba Online Independente liuhusi whatshapp katak, reativa misa iha Igreja  Katedral Santo Antonio Baucau no Igreja Colegio Fatumaca ne’e desizaun Bispo Dioseze Baucau nian.

Nia dehan,  SIJK laiha autorizasaun ba Dioseze Baucau atu reativa atividade reliajun.

“Ne’e Bispo Baucau ninia desizaun,”dehan nia liuhusi mensajen badak ba Online Independente, tersa (20/4).

Sosiedade balun mós preokupa iha media social katak, desizaun Dioseze Baucau ne’e kontrariu ho desizaun Konsellu Ministru nian.

Sosiedade sira ne’e duvidas ba interpretasaun Dioseze Baucau nian ba desizaun Konsellu Ministru ne’ebé suspende konfiamentu obrigatóriu no kontinua aplika serka sanitaria iha Munisipiu Dili, Baucau no Vikeke too loron 2 fulan-Maiu 2021.

Tanba ne’e, husu atu Governu, SIJK no Dioseze halo komunikasaun hodi solusiona situasaun ne’e hodi la hamosu konfuzaun iha públiku.

To’o notisia ne’e publika, Online Independente seidauk halo konfirmasaun ba parte Dioseze Baucau nian.

Jornalista: Saturnina da Costa

Editor: José Sarito Amaral