Membru RENETIL sira durante ne’e ida-idak iha ninia opsaun polítika rasik. Maibé, haree ba kontestu vizaun polítika hotu-hotu hanesan, tanba hakarak atu luta hodi defende povu no nasaun ne’e atu sai husi ki’ak no mukit.
“Intelektuál hotu-hotu ne’ebé ohin iha RENETIL balun iha partidu CNRT, FRETILIN, PD, PLP. Ami bele halo polítika, maibé RENETIL ida ne’e kuda ona iha ami nia fuan”, dehan fundadór RENETIL, Mariano ‘Assanami’ Sabino, iha Sentru Konvensaun Dili (SKD), horisehik.
Nia dehan, emosaun revolusionáriu sei moris nafatin iha membru RENETIL sira nia laran. Tanba ne’e, laiha laiha razaun atu fahe malu tanba partidu.
Maski diferente partidu, maibé iha kompromisu ida atu defende no valoriza nafatin interese nasionál. Tanba ne’e, sei la defende interese partidu hodi buka kadeira, maibé sei hamutuk tane nafatin interese povu nian ba oin.
Assanami hatete, RENETIL iha prinsípiu balun hanesan, prepara joven intelektuál sira bainhira Timor ukun-aan hodi apoiu oinsá atu prosesa konstrusaun estadu hodi bele dezenvolve povu no nasaun.
Tanba ne’e, polítika fundadór Estadu hanesan maun boot Kay Rala Xanana Gusmão, Mari Alkatiri, Ramos Horta, Lere Anan Timur, Lu-Olo, Taur Matan Ruak no sira seluk, hamutuk deside atu halo tranzisaun jerasionál, RENETIL preparadu.
Uluk iha tempu rezisténsia, iha Indonézia membru RENETIL sira dehan “di'ak liu lakon títulu, duke lakon lakon pátria”, entaun membru balun konsege lakon nia estudu, maibé ohin loron barak sai ona títulu no ohin loron balun asume kargu importante sira.
Tanba ne’e, kuandu iha tranzisaun jerasionál, membru RENETIL sira prontu asume responsabilidade ho la'ós ho interese kadeira, maibé atu responsabiliza.
Iha fatin hanesan, Prezidente Konsellu Nasionál Juventude Timor-Leste (KNJTL), Maria Dadi Magno hatete, hanoin liga ho unidade laiha duvida ba membru RENETIL sira maski sira iha diferente polítika no partidu, tanba unidade ne’e hatudu ona dezde uluk to’o ohin loron.
Diferensa polítika no partidu iha organizasaun rezisténsia ne’e nia laran, liuhusi kongresu ne’e bele reuni sira hodi hametin unidade no asaun iha uma laran hodi konstrui Estadu tuir kompromisu lulik ne’ebé uluk halo ona.
RENETIL Kontinua Haburas Demokrasia Iha TL
Ezisténsia organizasaun RENETIL funda hodi haforsa polítika rezisténsia liuhusi estudante timoroan hala’o estudu iha Indonézia atu kontribui ba ukun rasik aan. Maibé hafoin Timor-Leste hetan independénsia pozisaun RENETIL kontinua kontribui ba demokrasia.
Primeiru Ministru, Mari Alkatiri hateten, RENETIL forma husi estudante sira hodi aumenta kapasidade iha forsa frente klandestina nian ba luta libertasaun.
Nia haktuir, bainhira ukun membru RENETILI tomak hahú fahe malu ho ida-idak nia partidu, signifika katak prosesu demokrasia la’o, maibé unidade iha RENETIL mantein hodi hametin soberania ba demokrasia.
“Demokrasia mak nune’e duni atu ida-idak tuir nia dalan atu hanoin ho liberdade no atua ho liberdade ho objetivu atu kontribui ba pátria ida ke demokrátiku”, tenik nia, iha kongresu RENETIL ba dala VII.
