Husi númeru kazu ne'e nafatin Dili mak rejista aas liu ho totál  3.153, tuir Baukau 296, Manufahi kazu 174, Manatutu ho kazu 173,  Lautem ho kazu 155, Kovalima 146, Ermera 118, Likisa 115, Aileu 87,  Vikeke 75, Bobonaru 56, Ainaru 45, no RAEOA ho kazu 6.

"Husi dadus ne'e ita haree, kazu Dengue kontinua sa'e beibeik ho numeru ne'ebé aas. Dengue mós kontinua oho labarik sira, iha loron 3 maiu ne'e labarik na'in ida mate tan, no kazu mate hamutuk ona 52," Jornalista sita Komunikandu iha Tersa, (03/05).

Enkuantu, Munisipiu sanolu resin-ida ne'ebé  dadauk  rezita ona kazu mate mak, Dili rezista ona kazu 29, tuir Kovalima kazu 7, Ermera 4, Aileu 2, Ainaru 2, Vikeke 2, Bobonaru 2, Likisa 1, Manufahi 1, Manatutu 1, inklui Oecuse 1.

Liga ba kazu dengue ne'ebé sa'e makaas iha Dili, tuir destribuisaun kazu, Postu administrativu Dom Alexu mak númeru boot liu ho kazu 1.870, hafoin Postu Administrativu Kristu Rei ho kazu 487, Na'in Feto 392, Vera-Kruz kazu hamutuk 338.

"Ne’e hatudu katak, kada loron, kazu espalla nafatin ba iha postu administrativu sira seluk," subliña.

Ho ida nee, Ministériu Saúde kontinua informa ba públiku hotu, atu aprezenta aan iha fasilidade saúde sira ne’ebé besik bainhria sente isin manas ka laran sae, liman ain sikun moras, atu bele hetan atendimentu husi médiku sira. 

Husu mós ba autoridade munispiu inklui lokais, atu bele orienta komunidade halao limpeza jeral iha ida-idak nia suku inklui aldei tomak, fase tanke, bidon ka balde semana ida dala ida, limpeza roda aat sira, bazu aifunan atu susuk labele natolun.