Defensór Públiku Jerál, Cancio Xavier hatete, prezensa espesialista sira husi Defensoria Pública da União (DPU) ne’e hanesan etapa dala ualu husi programa kooperasaun entre nasaun rua, ne’ebé iha sistema justisa hanesan.
“Ita presiza ema sira ne'e mais espesializadu atu mai iha servisu asesoria no mós iha servisu sira ne'ebé sai formadór iha sentru formasaun, atu bele garante sustentabilidade dezenvolvimentu kualidade rekursu Defensoria ninian,” dehan Cancio, ba jornalista sira iha sala VIP Aeroportu Internasionál Komoro,hafoin simu prezensa husi Defensora Publika Brazileira, Ludmylla, Sesta(20/03).
Programa ne’e realiza liu husi parseria entre Defensoria Públika Timor-Leste no DPU Brazíl, ho apoiu husi Agência Brasileira de Cooperação (ABC), ne’ebé lao ona desde tinan 2005.
Tuir Cancio, kooperasaun ne’e importante tebes tanba Defensoria Públika Timor-Leste seidauk iha rekursu umanu sufisiente, no presiza apoiu husi espesialista atu haburas kapasidade interna.
Iha fatin hanesan, Embaixadór Brazíl iha Timor-Leste, Ricardo José Lutosa Leal, agradese ba prezensa peritu sira ne’ebé sei kontribui ba dezenvolvimentu setór justisa iha rai-laran.
Embaixadór ne’e hatete, kooperasaun ida ne’e fó rezultadu di’ak, liu-liu iha área formasaun no kapasitasaun ba majistradu no funsionáriu sira iha sistema judisiáriu.
“Kontente tebes tanba Dra. Ludmylla no Dr. Dinarty to’o ona atu koopera iha programa kapasitasaun ba setór justisa,” dehan Embaixadór Ricardo.
Defensora Públika, Ludmylla Mariana Anselmo hatete, nia sei foka uluk ba adaptasaun ho realidade lokál antes fó kontribuisaun direta.
"Ha'u servisu diretamente ho Defensoria Públika. Primeiro, ita sei koñese uluk realidade lokál depois haree oinsa mak ha'u bele kontribui,"dehan nia.
Entretantu, Defensora Publika Brazileira seluk, Kelery Dinarte da Páscoa Freitas, to’o uluk ona iha Timor-Leste, no hala’o vizita ba Defensoria Publika Balide, Dili, iha 17 Marsu ne’e.
Iha vizita ne’e, Defensór Públiku Jerál, Cancio, simu Defensór Públiku Federal Brazil ne’e no hato’o benvindu ba ninia prezensa.
Cancio agradese ba prezensa Kelery iha TL hodi kontribui nu'udar espesialista ba kursu daualu iha Sentru Formasaun Jurídika Judisiária (CFJJ) ba Juis,Ministériu Públiku, no Defensoria Públika.
