Kordenadór Pilár VII COVID-19 Dr. Nilton do Carmo da Silva hatete, tuir dadus foun Covid-19 loron 18 fevereiru 2021 hatudu, dadus komulativu kazu na'in 103, kazu foun na'in 1, rekuperadu na'in 18, no atuál baixa iha sentru saude vera cruz Dili na'in 22.
Pasiente rekuperadu na’in 3 husi Nasaun Tanzania, na’in 2 tama klandestina no na’in 13 maka mai husi Nasaun Indonézia liuhusi Pontu Entrada Batugade iha 20 Janeiru 2021.
"Liuhusi oportunidade ida ne’e ohin komisaun nasionál rejista tan kazu pozetivu foun Covid-19 Timor-oan mane na’in 1 ho idade 28. Pasiente ne’e asimtomátiku no dadauk ne’e iha ona izolamentu Vera Cruz, Dili,"dehan dr. Nilton liu husi konferensia imprensa kinta ohin.
Timor-oan na'in ida ne'ebé hetan positivu, dr. Nilton esplika, iha loron 4 fevereiru 2021 nia viájen husi Lóndres, Reinu Unidu bá Doha ho aviaun Qatar Airlines.
Iha loron 5 fevereiru Husi Doha bá Malázia, toba kalan ida iha Aeroportu Kuala Lumpur.
Nune’e iha loron 6 fevereiru husi Malazia mai Dili, Timor-Leste.
Sidadaun ne’e hela iha kuarentena Ótel Carla Mension, iha kauarentena ne’e iha pasajeiru hamutuk ema na’in 16.
Swab teste foti iha loron16 fevereiru no rezultadu POSITIVU relata iha loron 18 fevereiru.
