Vise-Prezidente Bankada CNRT, Patrocino Fernandes dos Reis, preokupa folin kombustivel ne'ebé kontinua sa'e, tanba impaktu husi merkadu globál.

"Fó fali subsídiu 40% ba transporte públiku sira, maibé governu hanoin ema sira presiza mina ne'e kala sira ne'ebé iha karreta ne'e de'it," dehan nia, iha Parlamentu Nasionál, horisheik.

Nia hateten, maibé depois sé mak fó subsídiu ba povu ki’ikoan sira ne'ebé uza motorizada, tanba sira mós presiza mina hodi halo atividade loroloron nian.

"Tuir ha'u-nia hanoin governu nia intervensaun ba kompaña sira ne'ebé suplly mina mai Timor atu normaliza folin mina iha merkadu ba ema hotu-hotu, kiik ka boot bele asesu ba folin mina ne'e," tenik nia.

Patrocino dehan, la'ós ba fali de'it subsídiu ba sira transporte públiku, depois povu baibain nafatin difikulta sira labele asesu ba mina.

"Kompaña tolu de'it mak suplly mina mai Timor, loloos folin sa'e US$ 0.80, governu foti US$ 0.80 kada litru, fó subsídiu ba kompaña tolu ne'e mak hatama mina mai Timor atu bele folin mina ne'e normaliza iha merkadu," dehan nia.

Nia fundamenta, agora dadaun folin mina kontinua sa'e, bainhira mak bele tuun fali presu normál seidauk hatene, entaun agora tenke hanoin atu buka alternativu hodi fó solusaun.

Iha fatin hanesan, Deputadu Bankada Fretilin, Mariano Fatubai Mota hateten, tuir loloos governu halo intervensaun ba kompaña tolu ne'ebé hatama mina husi li'ur, atu bele asesu ho folin ne'ebé baratu, duké ba de'it transporte públiku.

Molok ne'e, governu liuhusi Ministériu Transporte no Komunikasaun (MTK), Ministériu Agrikultura no Peskas (MAP) no Ministériu Petróleu no Minerais (MPM) halo ona lansa atribuisaun voucher kombustivel ba benefisiariu sira.

Ho alokasaun ba ezekusaun subsídiu kombustivel faze dahuluk hamutuk tokon US$ 1, ne'ebé MTK hetan US$ 500.000 no MAP hetan US$ 500.000.