Iha loron 29 fulan-Abril 2020, partidu CNRT simu karta husi partidu KHUNTO, hodi komunika katak, KHUNTO sai ona husi koligasaun AMP foun, atu hola parte iha Governu to'o tinan 2023.

Maibé Partidu CNRT hakarak fó lembra de’it katak, iha audiénsia ho Presidente Repúbliku, iha loron 6 fulan-Marsu 2020, Xefe Estado hatudu Lei Partidos Politikus ne’ebé ezijé katak asosiasaun ba koligasaun husi partidu sira, tenki hetan aprovasaun husi Kongresu ka konferensias partidu sira nian, kona-ba ambitu asosiasaun né’e.

Ho ida ne'e, mak Partidu KHUNTO, iha nia Kongresu, iha kedas ioron loron 6 fulan0-Marsu, hasai rezolusaun hodi aprova KHUNTO tama iha koligasaun foun AMP.

“Partidu CNRT hakarak fó lembra ba Partidu KHUNTO kona-ba nesesidade atu halo fali kongresu ka konferensia ida hodi deklara katak rezolusaun atu asosia ba koligasaun AMP foun ne‘e LA VALE ona,”dehan iha komunika impresa ne’ebé INDEPENDENTE Online asesu, Segunda (04/05).

Iha komunikadu haktuir, atu evita de’it katak iha loron ikus mai, partidu ida, bele reklama katak Rezolusaun ne’ebé sai iha Kongresu KHUNTO, husi loron 6 too 8 fulan-Marsu, sei vale nafatin ka ‘sei kesi' hela partidus sira.