Nia haktuir, maske simu ona pedidu husi MSSI, maibé parte CLN sei hein despaisu husi Ministru Koordenador Asuntu Ekonomia (MKAE), ne’e duni bainhira iha ona despaisu hafoin bele distribui.

"Ami simu pedidu husi MSSI hamutuk tonelada 1150, nune’e atu bele atende ba iha apoiu umanitáriu balun husi autoridade lokál ba ita nia grupu vulneravel sira ne’ebé presiza," dehan Adelina Andrade de Jesus ba Jornalista INDEPENDENTE iha nia knaar fatin Bebora, (16/08).

Nia haktuir, bainhira CLN entrega fós ho kuantidade bo’ot ba MSSI, konserteza sei la simu ona pediu kikoan sira ne'ebé kabe ba kompetensia MSSI nian.

Pedidu ne'ebé MSSI hato’o sei hein despaisu husi MKAE no bainhira hetan ona aprovasaun hafoin mak bele distribiu ba MSSI.

"Agora fos labele rai kleur no tenke distribui ona. Baibain fulan tolu (3) to'o fulan neen (6) ita tenke loke armajen atu nune’e bele asegura nafatin fos nia kualidade," tenik nia.

Nia klarifika, fos kuandu liu ona fulan neen sei bele distribui, maibé nia kualidade mak tun ona.

Iha parte seluk Diretór Armajenamentu MSSI, Lucas Tois hateten, fos ne'ebé CLN atu distribui ba Dirasaun MSSI nian iha kada Munisipiu, tanba agora dadauk armajen mamuk ona.

"Ami konfirma nafatin mais to'o agora seidauk iha respota tanba ami nia armajen mamuk ona," tenik nia

Aliende ne'e CLN mós sei faan ba kompaña sira ne'ebé balun hatama ona pedidu hodi sosa no faan tutan fali merkadu.

Nia dehan, kompaña sira ne’ebé sosa husi CNL ho presu $ 8.00 to'o $10.00 kada saku ho 20kg no sei faan iha area remota labele liu $ 11.

CLN Sosá Produtu Lokal

Aliende ne’e, Minitériu Koordenadór Asuntu Ekonomiku (MKAE) aloka Orsamentu hamutuk rihun tolu ba Sentru Lojistika Nasionál (CLN) hodi sosa produtu lokál, nune’e bele hamenus fós importasaun.

Adelina Andrade de Jesus haktuir orsamentu ne'ebé iha atu sosa produtu local husi grupu agrikultór sira hodi hatama ba armajen.

"Iha tinan ne'e ami iha alokasaun orsamentu rihun tolu resin hodi sosa fós lokál no produtu local sira. Dadauk ne’e kompañia sira mós kontinua sosa produtu local husi ami ba iha sesta bázika nian," nia informa.

Nia dehan, produtu lokál ne'ebé sosa husi grupu agrikultór sira ne’e mai husi Munisipiu Suai, Viqueque, Manatutu no fatin sira seluk hodi nune’e bele motiva nafatin agrikultór sira kontinua halo produsaun.

Tuir nia, programa ne'ebé governu iha sempre fó prioridade ba grupu agrikultór sira nune’e parte CLN bele sosa nafatin agrikultór sira nia produtu.