Tan ne’e, nia rekoñese katak, komunidade iha kapital Dili, barak mak seidauk asesu ba bee moos.
"Ita rekoñese iha fatin barak iha Dili, ita nia komunidade balun seidauk asesu ba bee, ita kontinua esforsu atu mantein jere sistema ne'ebé iha atu lori ba ita nia komunidade sira," dehan nia, iha Palasiu Governu, tersa ne’e.
Nia hatutan, bainhira hala’o enkontru, Primeiru mós orienta BTL, atu bele aselera liu tan bee no saneamentu ba komunidade sira iha teritoriu tomak.
Nune’e mós, halo manutensaun ba operasaun sistema fornesimentu sira, atu bele garante bee ba komunidade sira.
"Tanba, tuir Xefi Governu nia observasaun, ita halo duni esforsu, maibé presiza aumenta tan esforsu sira ne'e, atu bele aselera servisu sira ne'e no ita nia sistema sira iha Dili barak ona, maibé Bee Timor-Leste, ita halo esforsu rua agora la'o dadaun, esforsu primeiru mak ami nia ekipa operasaun manutensaun kontinua halo servisu melloramentu ba sistema sira ne'ebé agora eziste, hodi garante bee ne'e la'o," nia akresenta.
Aliende ne'e, iha área investimentu, Primeiru Ministru haktuir, presiza aselera investimentu projetu foun sira iha área rural no postu sira no mós iha capital Dili.
Ezekutivu ne’e haktuir, PM mós fó orientasaun ba BTL, atu halo koordenasaun ho Parseiru sira iha prosesu implementasaun, atu nune’e labele infrenta problema sira hanesan.
Tan ne’e, BTL nafatin esforsu hodi halo preparasaun integradu hodi mellora sistema bee iha Dili ba tempu naruk nian.
Entretantu, molok ne’e, Governu liu husi Ministru Finansas, Rui Augostus Gomes, asina ona akordu ho Banku Mundial ba emprestimu osan dolar amerikanu millaun $121, hodi fornese bee moos ba populasaun sira iha kapital Dili.
