Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, husi kazu ohin iha mane na’in 57 no feto na’in 38.
“Husi totál kazu detetadu foun ohin, iha idade tinan 12 mai kraik na’in 6, idade entre tinan 12 to’o 59 iha na’in 86 (95,2%) no idade 60 ba leten iha na’in 3,”dehan nia iha komunikadu ne’ebé Online INDEPENDENTE asesu, sesta ohin (07/05).
Rui relata, husi totál kazu detetadu foun ohin, proporsaun kazu sintomátiku hamutuk pursentu 11. Proporsaun kazu sintomátiku durante loron 7 nia laran, aumenta husi média pursentu 8,8 iha semana 2 liu bá no ba média pursentu 15,1 ohin.
Nune’e komulativu kazu konfirmadu sura husi loron 21fulan-marsu 2020 to’o loron 7 fulan-maiu tinan 2021 hamutuk 2.965.
Dadus jeral ba loron ohin iha kazu foun na’in 95, kazu rekuperadu na’in 147 no kazu ativu iha sala Izolamentu hamutuk 1.365.
Ho nune’e husi horiseik (06/05) mai ohin (07/05) teste PCR ne'ebé Laboratóriu Nasionál Saúde halo hamutuk 847 kompostu husi, Vijilánsia sentinela 30, Rastreiu ba kontaktu (Contact tracing) 50, Rastreiu Aleatoriu (Random Screening) 585, Viájen sai husi serka sanitária husi Dili 157, Viájen internasionál 13 no Follow up iha kuarentena 11.
Aliende, total testes PCR ne’ebé halo horseik (06/05) iha munisípiu sira seluk hamutuk 416 kompostu husi, Ermera 80, Maubisse 155, Suai 49, Maliana 17, RAEOA 44 no Viqueque 71.
Asisten Editor: Saturnina da Costa
