Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Dr.Rui Maria de Araújo hatete, kazu foun ne’ebé relata ohin iha mane na’in 42 no feto na’in 24.
“Kazu foun ohin iha asintomátiku na'in 56 no Sintomátiku na’in 10,”dehan nia liu husi komunikadu (29/04).
Ho nune’e, husi total kazu detetadu foun ohin iha na’in 31 (46,9%) mak deteta liu-husi teste ho razaun atu halo viájen ka halo ona viájen ba munisípiu hafoin deteta pozitivu. Sira ne’ebé rezultadu teste pozitivu, sira-nia hela fatin iha Díli iha duni cluster sira ne’ebé iha kazu detetadu barak.
Totál kazu konfirmadu kumulativu iha loron 29 fulan-abril 2021 sura husi loron 21 fulan-marsu 2020 hamutuk 2190.
Entretantu kazu rekuperadu na’in 47 no atual baixa iha sala izolamentu lima hamutuk 1.123.
Husi horiseik (28/04) mai ohin (29/04) teste PCR ne'ebé Laboratóriu Nasionál Saúde halo hamutuk 952, ho detallu hanesan tuir mai,Vijilánsia sentinela: 34, Rastreiu ba kontaktu (Contact tracing): 112, Rastreiu Aleatoriu (Random Screening): 237, Viájen sai husi serka sanitária husi Dili: 475, Viájen internasionál: 33, Follow up iha kuarentena: 62.
Enkuantu, total teste PCR ne’ebé halo horseik (28/04) iha munisipiu seluk hamutuk 374, ho detella hanesan tuir mai, Maubisse: 115, Maliana: 50, Viqueque: 63, Suai: 6 no Baucau:115.
Evulusaun surto Covid-19 iha munisipiu Dili no munisipiu sira seluk inklui REAOA.
Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-nain epidemiolojia nian uza mak insidénsia.
Tanba ne’e konvensionalmente insidénsia sukat totál kazu foun kada loron pur mil abitantes no hatudu risku ne’ebé populasaun iha atu hetan da’et moras ida.
Iha loron hirak liubá publika ona prevelénsia ne’ebé sukat persentajen husi ema ne’ebé detetadu hetan moras ida, iha populasaun nia leet, no hatudu problema moras ne’e boot to’o iha ne’ebé.
Informasaun adisonal ba loron ohin (29/04), iha izolamentu Vera Cruz iha kazu detetadu na'in 25, iha área obstetrisia na'in 12, medisina interna 12 no pediatria 3.
Sira na'in 12 iha obstetrisia kategoria moderadu hotu, sira-nia kondisun estável. Na'in 12 iha medisina interna iha na'in 4 grave, 8 moderadu. Husi grupu grave 1 ne’ebé uza ventilador, horiseik sirurgiaun Timoroan sira halo tracheostomia iha Vera Cruz hodi bele fasilita nia dada-i’is, maski uza nafatin ventilador. Nia kondisaun to’o ohin, estável. Nain 3 seluk ne’ebé grave, uza oksijéniu ho mask.
Kazu 3 iha pediatria, na’in 2 moderadu no na’in 1 grave. Nain 1 grave uza CPAP no na’in 2 moderadu la uza ona oxijéniu.
SIJK nafatin apelu ba populasaun iha Timor-Leste laran tomak, favór respeita nafatin regra prevensaun no ijiéne individual ne’ebé Governu hatuur ona atu prevene moras Covid-19 da’et ba mai. Regra sira ne’e hanesan ita hotu hatene ona mak, uza mascara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta malu lapresiza kaer liman, bensa-liman, rei-malu ka hakuak malu, evita halibur malu barak no hamriik ka tuur dook husi ema seluk mínimu metru ida ho balun.
Dadus mundial atual Covid-19 kazu konfirmadu na’in 148,999,876 no mate na’in 3,140,115.
Jornalista:Saturnina da Costa
Editor:Jose Sarito Amaral
