Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo hatete, husi kazu foun detetadu ohin iha mane na’in 63 no feto 63.

“Kazu foun ne’ebé relata ohin 126, idade tinan 12 mai kraik iha na’in 5, idade entre na’in 12 to’o 59 iha na’in 118 no idade 60 ba leten iha na’in 3,”dehan nia iha komunikadu imprensa segunda ohin (10/05).

Rui relata, husi totál kazu detetadu foun ohin, proporsaun kazu sintomátiku hamutuk pursentu 11,1 (11,1%).

Komulativu kazu konfirmadu sura husi loron 21 fulan-marsu tinan 2020 to’o loron 10 fulan-maiu tinan 2021 hamutuk na’in 3,353.

Nune’e dadus jeral ba loron ohin iha kazu foun na’in 126, kazu rekuperadu hamutuk  82 no kazu ativu ne’ebé iha Sala Izolamentu hamutuk 1,584.

Husi horiseik (09/05) mai ohin (10/05) teste PCR ne’ebé Laboratóriu Nasionál Saúde halo iha Dili hamutuk 719 kompostu husi, Vijilánsia sentinela iha na’in 70, Rastreiu ba kontaktu (Contact tracing) iha na’in 85, Rastreiu Aleatoriu (Random Screening) iha na’in 251, Viájen sai husi serka sanitária husi Dili hamutuk na’in 304, Viájen internasionál laiha no Follow up iha kuarentena hamutuk na’in 9.

Aliende, total testes PCR ne’ebé halo iha loron horseik (09/05) iha munisípiu sira seluk hamutuk 223 kompostu husi, Ermera na’in 29, Maubisse na’in 71, Suai na’in 18, Maliana na’in 7 no Baucau iha na’in 98.

Entretantu, informasaun husi sala Izolamentu iha Vera Crus halo tratamentu ba kazu detetadu na’in 36 fahe ba Obstetrisia na’in 17, Sirujia na’in 1, Medisina interna iha na’in 16 no Pediatria iha nain 2.

Na’in 17 iha obstetrisia kategoria moderadu hotu, sira-nia kondisun estável.

Sira na'in 16 iha medisina interna, 1 grave uza hotu oksijéniu, 15 moderadu.

Kazu 1 sirurjia tama ho open fracture, moderadu. Kazu 2 pediatria moderadu hotu.

SIJK husu populasaun iha Timor-Leste laran tomak, favór respeita nafatin regra prevensaun no ijiéne individual ne’ebé Governu hatuur ona atu prevene moras Covid-19 da’et ba mai.

Regra sira ne’e mak hanesan,  uza mascara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta malu lapresiza kaer liman, bensa-liman, rei-malu ka hakuak malu, evita halibur malu barak no hamriik ka tuur dook husi ema seluk mínimu metru ida ho balun.

Asistente Editor: Saturnina da Costa