Arsebispu Edgar hatete, soru-mutu ho Prezidente Parlamentu Nasionál nu'udar enkontru ikus molok fila hikas ba Roma-Vatikanu.

"Parlamentu Nasionál Timor-Leste hanesan parlamentu dahuluk iha mundu, ne’ebé aprova no adopta dokumentu kona-ba fraternidade umana," dehan nia, iha Parlamentu Nasionál, Sesta (23/9).

Arsebispu Edgar hatete, Timor-Leste hatudu nia interese ba dokumentu Fraternidade Umanu hodi kria sentru ida espesifiku no hein Timor-Leste sei sai nasaun ida avansadu no la'o ba oin.

Iha soru-mutu ne’e ko'alia kona-ba misaun Parlamentu Nasionál Timor-Leste ni'an ne’ebé aprova ona lei no renovasaun ba lei sira iha país ne’e ho baze ba Estadu.

Aliende ne'e, Arsebispu Edgar ko'alia ho Parlamentu Nasionál kona-ba edukasaun iha Timor-Leste.

"Ko'alia mós kona-ba obra sosiál sira no hamutuk ho parlamentu hanoin hikas mós momentu importansia sira iha ne’ebé Igreja akompaña povu ne’e iha momentu sira prosesu libertasaun nasionál  no oras ne’e besik liu ho povu no kontinua akompaña povu timorense," dehan nia.

Arsebispu subliña, nafatin hanoin tinan 20 independênsia Timor-Leste atu nasaun ne’e kontinua la'o ba oin mezmu iha difikuldade.

"Maibé koko ho posibilidade hotu atu nafatin iha sidadaun sira-ne’ebé ki’ak no nesesita sira-nia sorin. Entaun iha tempu tuir mai, buka nafatin atu iha tema nasionál ida hodi kontinua tau-matan ba sidadaun ki’ak sira-ne’ebé nesesita apoiu," tenik nia.

Iha soru-mutuk ne'e, nia afirma, la diskute kooperasaun direita tanba Parlamentu Nasionál nia funsaun no preokupasan mak halo lei lokál iha país ne’e.

Maibé ho igreja lokál, Parlamentu Nasionál bele dezenvolve tema importante sira ba povu nia moris tanba preokupasaun Igreja nian dezde uluk to'o ohin loron mak povu nia moris.

"Ha’u hanoin kardeál iha ne’e, hamutuk ho bispu no Na'i Lulik sira no Igreja Katólika sei hamutuk ho órgaun soberanu sira tau-matan ba povu nia moris," tenik nia.

Nia fundamenta, parabéns ba hotu-hotu hamutuk nafatin iha orasaun, Papa Francisco nia bensaun nakonu ba povu ne’e.

Iha fatin hanesan, Prezidente Parlamentu Nasionál, Aniceto Longuinhos Guterres Lopes hateten, Vise-Primeiru Santa Sé mai vizita Timor-Leste nu’udar bainaka Estadu tomak nian, tanba mai inuagura embaixada Núnsiu Apostóliku nian.

Nia hateten, kuandu ko'alia Núnsiu Apostóliku no relasaun diplomatika ne'e tenke ho Estadu.

Aliende ida-ne'e, Parlamentu Nasionál aprova rezolusaun ida hodi adopta Abu Dhabi kona-ba fraternidade umana sai dokumentu nasionál.

"Foin daudauk lansa ona iha Prezidensia Repúblika no iha ona simpoziu ida fraternidade umana," katak nia.

Nia afirma, prontu Parlamentu Nasionál asume nia responsabilidade nu'udar lejizladór fó órgaun desizaun polítika desizaun hola hotu ona.