"ANPM hakarak informa ba publiku katak fornesementu ka stock kombustivel hanesan, gazolina no gazoel iha armazen bo’ot rua hanesan Pertamina International Timor (PITSA) iha Praia dos Coqueiros no Esperanca Timor Oan (ETO) iha Hera sufisiente hela hodi bele atende nesesidade konsumidores iha Timor laran tomak,"dehan Komunikadu ne’ebé Online INDEPENDENTE asesu iha pajia ofisial ANPM, kinta horseik (28/07).

Aliende ne'e, ANPM mós hakarak informa katak, oras ne’e dadaun Ró tula kombustivel atraka ona iha Ponte Kais Armanezen Kompañia PITSA nian no sei halo deskaregamanetu ohin loron (28/07), kuantidade Gazolina hamutuk litru tokon 2 resin (2.494.372 litru) no Gazoleo tokon 1 resin (1.632.203 litru).

Enkuantu, ANPM sei konfirma kuantidade kombustivel iha Armazen Kompañia ETO nian, maske nune’e, kompania ETO fó sai ona iha sira nia pajina media sosial katak sira iha reserva kuantidade nebe sufisiente.

Ho nune'e, Kompania PITSA no ETO hanesan distributor bo’ot rua iha Timor-Leste sempre importa kombustivel tuir kalendariu importasaun no mós depende ba nesesidade iha rai laran. To’o agora laiha interupsaun ba kalendariu importasaun kombustivel.

Tanba ne’e, ANPM apela ba públiku katak atu la presiza paniku ho rumores ka boatus kona-ba kombustivel menus iha armazen ho retallu sira.

“Ho kolaborasaun diak tomak hamutuk ho importadores ho postu abatesementu kombustivel sira hotu ANPM sei garantia distribuisaun kombustivel iha merkadu ho efetivu no efikas,”haktuir komunikadu refere.

Entretantu, Primeiru Ministru, Taur Matan Ruak mós husu ba públiku atu lalika pániku tanba Empreza importador kombustível mina hanesan ETO no PERTAMINA garante ba Governu katak stock kombustível iha armazén sei iha hela.

PM dehan, daudaun ne’e hosi PERTAMINA nian deskarga hela litru millaun 4, iha Jetty, enkuantu ETO nian iha hela dalan. Maske nune’e Xefe Governu akresenta, karik situasaun kona-ba kombustível extrema, Governu bele intervein liuhosi Empresa Estatal Timor GAP hodi importa mina mai rai-laran.