Ekipa selesaun Angola halakon ekipa Cabo Verde ho score 2-0 liu husi nia jogadór prinsipal na'in rua ho naran Pedro António ho Manúel Pires, produs golu rua ba adversariu Cabo Verde.
Hanesan bai-bain bainhira jogu hahu ekipa rua lansa kedan kontra atake ba malu, liu husi tekniku no abilidade ekipa ida-idak nian tuir orientasaun treinadór sira nian.
Ekipa rua hala'o jogu tuir duni orientasaun hirak ne'e ho di'ak, hodi halo kontra atake ba malu, hodi halo barullu iha liña defeza ekipa ida-idak ni’an,hodi lansa sutu balun, maibe seidauk kona alvu.
Nune'e, ekipa Cabo Verde ne'ebé halo jogu agresivu hodi halo ameasa ba guarda rede Angola nian iha minutu 8, maibe seidauk to'o nia tarjetu, tanba ne'e Angola halo jogu ho modelu ofensivu, maibé liña defeza Cabo Verde solidu tebes hodi la fó fatin ba avansadu Angola nia hodi produs golu.
Maske esforu hirak ne'e seidauk fo susesu ba Angola, maibe jogador sira nafatin solidu iha kampu ne'ebé enfeita ho duut matak, hodi hala'o jogu ho esperansa katak tenke hatama golu, ida ne'e mak objetivu ekipa ida-idak ni’an.
Ekipa rua hala'o jogu hetan apoiu maka’as husi adeptus Angola no Cabo Verde, ne'ebé tur iha tribuna leten estádiu Dili, ne'ebé hakilar halo estádiu barollu, hodi hamanas espiritu jogador nasaun nian, hodi esforsu makas liu tan hatama golu.
Maske Ekipa rua ne'e kuaze halo jogu uza barak liu fiziku, no halo kontra atake maioria husi parte karuk no lops, to'o primeira parte termina rezultadu empata 0-0.
Tama ba segunda parte, Ekipa Angola komesa halo presaun ba liña defeza Cabo Verde nian, nune'e Jogadór Angola, Pedro António ho numeru kamizola 15, konsege fura rede Cabo Verde iha minutu 44.
Husi golu refere halo Angola hatudu jogu ne'ebé atrativu liu tan, maibe Cabo Verde la nonok de'it, hodi halo kontra atake, maibe Angola halo jogu agresivu liu tan halo liña defeza Cabo verde barullu liu tan.
Nune'e, iha minutu 64 Angola lori mehi aat ba Cabo Verde, liu husi nia jagadór Manuel Pires ho numeru kamizola 11 konsege konsege hatama golu tan Guarde rede Ekipa Cabo Verde nian, hodi muda score ba 2-0
Sofre golu husi Angola, Ekipa Cabo Verde komesa hasa’e ritmu jogu hodi halo lansa kontra atake, maibé Angola hametin liu tan nia liña defeza hodi la fo, fatin ba Cabo Verde, atu bele responde golu ruma.
Minutu mós la’o dadauk, ekipa Angola nafatin esforsu, atu bele aumenta tan golu ruma, maibé sutu sira ne'e sei antisipa ho di'ak, maibe jogadór Angola buka atu kria nafatin oprtunidade, maibe oprtunidade hirak ne'e la konsege iha rezulta tan golu ruma to'o segunda termina la iha tan golu ruma.
Nune’e jogu daruak ba CPLP, Angola manan Cabo Verde ho score 2-0, rekolla pontu tolu.
Editór: Aquino Gomes
