Prezidente BTL, Gustavo da Cruz, hatete, sidade Dili iha alargamentu ba Estrada ho ida ne’e afeta mós ba distruibuisaun bee moos ba komunidade sira, maibé BTL iha maneira rasik hodi asegura bee ba komunidade sira hodi asesa.

“Loos duni iha kapitál Dili iha alargamentu estrada ne'ebé mak akontese ninia implikasaun ne'e boot duni ba iha distribuisaun bee ba ita nia komunidade sira.”

“Ida ne'e catatan ida ba iha BTL para la halo distribuisaun bee ba ita nia komunidade lae, tanba alargamentu ne'e afeta ba liña distribuisaun kanalizasaun ne'ebé mak iha BTL sempre asegura hela tau tanki iha komunidade nia leet hodi ami bele instala permanente sistema ba ita nia komunidade sira, alargamentu estrada ne'e mós ajuda ona BTL implementa oituan oituan ba dezenu detalladu ne'ebé mak halo ona ba sistema bee Dili nian. Agora dadaun kanu ne'ebé mak ami tau ajusta kedas ona tuir planu ne'ebé mak ami iha”, Prezidente BTL hato’o asuntu ne’e ba jornalista sira iha salaun CNE, Kolmera, Segunda (23/03/2026).

Nia haktuir, komunidade barak loos mak halerik no lamentavel tebes ho situasaun ida ne'e, tanba ne'e mak ho selebrasaun ida ne'e konvida mós Xefe Suku sira iha Dili laran ne'e mai atu partilla informasaun ne'e atu sira mós bele hatutan ba komunidade sira atu kalma no hein tekniku sira bele hadia sistema sira ne'e bele la'o ho di'ak.

Iha fatin hanesan Prezidente Autoridade Munisípiu Dili (PAM) Francisco dos Santos, informa ho largamentu estrada kanu barak mak sei estragus, no husu ba BTL atu nafatin servisu hodi tau altertivu seluk atu komunidade sira labele halerik ba bee moos.

“Ita hotu-hotu akompaña iha alargamentu Estrada sira presiza, iha Dili laran sei halo alrgamentu Estrada sira ne’e hotu, tanba ne’e sei estraga mós kanu barak iha Dili, importante mak ita boot sira tau alternativu iha Dili laran para komunidade sira labele hakilar kona-ba bee moos”.

Nue’e mós Xefe Suku Bidau Santa-Ana, Alexandriano Bras, komenta, iha Suku barak kuaze komunidade sira to’o agora balun seidauk asesu ba bee moos liuliu aldeia sira ne'ebé mak hela iha foho leten, tanba ne’e husu ba BTL atu buka mekanizmu atu bele rezolve komunidade sira ninia nesesidade.

“Maibé ami husu ba parte BTL nian atu nafatin esforsu oinsá atu bele buka mekanizmu oin-oin atu ne'e bele rezolve komunidade sira ninia nesesidade liliu komunidade sira ne'ebé to'o agora seidauk konsumu. Suku Bidau Santa-Ana iha Aldeia 4 kuaze Aldeia 4 ne'e kuaze pursentu 90 % no hela pursentu 10% komunidade mak seidauk asesu ona ba bee moos, no sira ne'ebé seidauk asesu ne'e sira ne'ebé hela iha foho leten,” katak nia.