“Ha’u mós husu ona ba konsellu ministru atu nune’e estadu ho Governu liu-liu Primeiru-Ministru ho Prezidente Repúblika atu haree fila-fali pozisaun ita nian kona-ba Myanmar, tansa mak Timor-Leste vota abstein ba rezolusaun Myanmar dezde tinan 2010 to’o ohin (2021),” dehan nia ba jornalista sira, iha Palásiu Governu, Kuarta ohin (23/06).

Nia hatutan, Timor-Leste vota abstensaun bá kazu violasaun direitu umanus iha Myanmar, ne’e hatudu konsistensia polítika externa Governu Timor nian ne’ebé dezde iha tinan 2010 abstein ona.

Nune’e, bainhira atu muda pozisaun estadu Timor-Leste nian, tenke iha konsertasaun polítika estadu liu husi órgaun soberania hanesan Prezidente Repúblika, Parlamentu Nasionál no Primeiru-Ministru, tanba MNEK mesak labele muda pozisaun estadu nian.

“Ha’u husu ba Primeiru Ministru no aban ha’u mós husu ba Parlamentu Nasional imi nia hanoin oinsa tenke hatete bá MNEK, se pozisaun ba direitu umanus ba Myanmar ita muda, entaun dehan ba MNEK muda, MNEK vota abstesaun, tanba dezde iha tinan 2010 polítika Governu nian ba kazu ne’e ita vota konsensus ou abstensoens,” tenik nia.

Nia akrsenta, ba kazu Myanmar nia dehan, tuir loloos MNEK vota konsensus, maibé tanba estadu seidauk iha konsertasaun atu muda pozisaun Timor-Leste nian, nune’e MNEK tenke kumpre.

Tuir nia, pozisaun ne’ebé nunka muda iha estadu ne’e mak ‘one chine police’, kona-ba auto-determinasaun Palestina, no auto determinasaun ‘Wester Sahara’, reforma konsellu seguransa hafoin Myanmar, nune’e Governu nunka muda pozisaun.

Tanba ne’e, MNEK prontu kumpre bainhira estadu Timor-Leste muda pozisaun ba kazu Myanmar nian.

Entretantu, Golpe Militar akontese iha loron 1 fulan-Fevereiru tinan 2021 foin dadauk ne’e.

Tuir informasaun husi Asosiasaun Asistensia Prezu Politiku (AAPP) ne’ebé jornal INDEPENDENTE sita husi kompas.com, to’o ohin loron forsa seguransa junta Myanmar oho ona ema liu na’in 860 no detein kuaze na’in 5.000

Iha fulan Juñu ne’e nia laran, Asembleia Jeral Organizasaun Nasaun Unidus (ONU) aprova rezolusaun ida ne’ebé kondena junta militar, ne’ebé hada’u ukun husi governasaun eleitu iha Fulan-Fevereiru.

ONU mós ezije atu liberta prizioneiru politiku, hanesan lider eleitu Aung San Suu Kyi, no hakotu ona violensia ba ema ne’ebé halo manifestasaun pasifiku.

Rezolusaun ne’e hetan apoiu husi nasaun 119, ho Belarus mak vota kontra. Enkuantu nasaun 36 seluk vota abstensaun, inklui Rusia, Xina no Timor-Leste. Rusia no Xima sai nu’udar fornesidór kilat boot liu ba Myanmar.

Enkuantu, Deputadu Bankada PD,  Mariano Assanami Sabino  hatete, Bankada Demokrátiku kondena maka’as ba atuasaun governasaun ba situasaun Myanmar nian.

“Tanba ita-nia luta baze ne’e demokrásia ba direitu umanu, demokrásia ne’e rasik ita proklama iha 28 novembru katak ita-nia rain ne’e Repúblika.

Prezidente Bankada FRETILIN, Francisco Miranda Branco hateten, votu asbtesaun ba situasaun Myanmar Bankada FRETILIN mós kondena maka’as ba pozisaun ida-ne’e.

“Votasaun abstensaun la valoriza ita nia istória ne’ebé Timor-Leste liu husi prosesu ida solidariedade mundiál no agora maluk povu Myanmar presiza solidariedade husi ita, maibé ita abstensaun,” dehan nia.

Vise-Prezidente Bankada CNRT, Deputadu Patrocini0 dos Reis Fernandes hateten,  triste bainhira Timor-Leste fó votu abstensaun ba situasaun iha Myanmar.

Nasaun RDTL no Estadu direitu demokrátiku mak vota abstensaun ba violasaun direitu umanus iha nasaun ida ne’ebé oho ema barak.

“Halo  hau hanoin fali kala reflete situasaun 18-19 maiu 2020 ninian mak tranforma ona Estadu Timor-Leste ninia pensamentu la’o ona ba ditadura karik,” nia hateten.

Fatin ketak, Koordenador Klibur Munisípiu Dili, Manegas dos Santos hateten,  Organizasaun Klibur Tane Ass Obra Maun Boot Kayrala Xanana Gusmão sente triste no moe tanba Governu liu husi delegasaun MNEK Timor-Leste ba tuur iha membru ONU fó vota abstensaun ba rezime militar iha Myanmar.

Maske Nasaun barak iha Europa ,Afrika No sudeste Asiatiku sira kondena maka’as ba aktus ditadura rezime militar iha Myanmar.

“Organizasaun Klibur Tane Ass Obra Maun Boot Kayrala Xanana Gusmão kondena maka’as Ministra Negosiu Estrajeriu no kooperasaun, tanba laiha kordenasaun mutuál atu garante dignidade Estadu no povu iha mundu nia oin,” dehan nia, iha Palapasu horisehik (22/06).

Asistente Editor: Saturnina da Costa