Enkuantu, Governu Timor-Leste liu husi MS, simu ona vasina Pfizer BioNTech hamutuk doze 100,620 husi Governu Estadus Unidus Amerika (EUA), iha loron 16 fulan-Outubru tinan ne’e.

“Vasina Pfizer BioNTech ne'ebe ita simu sei implementa ba labarik sira tinan entre 12-17 mai kraik, iha loron 25 fulan-Outobru tinan ne'e. Doasaun husi Governu Estadus Unidos Amerika ne'e fundamental ba ita nia esforsu hodi vasina labarik sira no proteje sira husi impaktu Covid-19,”dehan Ministra Saúde, Odete Maria Freitas Belo, iha SAMES, Kampun Alor, segunda horseik (18/10).

Governante ne’e hatutan, MS sei identifika eskola sira ne’ebé númeru labarik 12 to’o 17 barak liu, hodi atende uluk sira hafoin ba eskola sira ne’ebé ho númeru kiik.

Iha fatin hanesan, Reprezentante UNICEF, Bilal Durani hatete, UNICEF iha komprimisiu atu servisu hamutuk nafatin ho Governu hodi asegura labarik sira ne’ebé hasoru dezafiu iha situasaun Covid nia laran.  

“Ba alin no labarik sira hotu iha Timor-Leste ha’u hatene katak dezafiu sira ne'ebé pandemia ne'e lori, afeta ona aspetu barak husi imi nia moris sira komesa husi saúde, mental ba to’o lakon oportunidade iha prosesu aprendizajen nian tanba eskola sira hotu taka,”hakotu nia.

Nune’e, tuir dadus labarik ho idade 12-17 ne’ebé asesu ba eskola hamutuk rihun 212 no labarik ne’ebé la asesu ba eskola hamutuk rihun rihun 41.

Asistente Editor: Saturnina da Costa