DILI: Servisu Munisipal Seguransa Alimentar Munisipiu Dili sei implementa atividade prinsipal 10 durante tinan 2026 hodi reforsa seguransa aihan no monitoriza konsumu públiku iha Munisipiu Dili.
Diretora SMSA Dili, Francisca Assis esplika, instituisaun ne’e harii bazeia ba dekreitu lei nu.84/2023, 23 Novembru, alterasaun da 5 husi dekreitu lei nu.3/2016, 16 Marsu, kona-ba Estatutu Administrasaun Munisipais no Autoridade Munisipiu.Artigu 9 husi regulamentu ne’e esplika kona-ba kompeténsia SMSA iha koordenasaun husi Ministériu Administrasaun Estatál (MAE).
"Ami-nia planu asaun ida ne'ebé ami elabora bazeia ba dekreitu lei no mós bazeia ba diploma Ministerial númeru 85, ne'ebé defini tarefas husi departementu sira, ho nune'e ami tutela ba Autoridade Munisipiu Dili," dehan nia ba Jornalista INDEPENDENTE, iha nia kna'ar fatin, Bekora (10/02).
Ajenda prinsipal ba 2026
Iha tinan 2026, SMSA sei hala’o atividade prinsipal sira, hanesan:
- Halo monitorizasaun no fiskalizasaun ba programa Merenda Eskolar.
- Halo nonitorizasaun no fiskalizasaun ba lojas no restaurante sira iha Munisipiu Dili
- Halo monitorizasaun no fiskalizasaun ba fatin produsaun bee hemu ba garafaun no botir.
- Halo monitorizasaun ba abastesementu bee-moos
- Halao workshop rezultadu monitorizasaun no fiskalizasaun
- Halo dezeminasaun informasaun kona-ba aihan nutritivu relasiona ho programa Merenda Eskolar
- Halo ligasaun entre agrikultores sira ho GAT ne’ebé ezekuta osan ba programa Merenda Eskolar
- Halo pratika toos uma hun no toos eskolar
- Halo atividades transformasaun produtu agrikola
- Atividades sira seluk ne’ebé relasiona ho seguransa aihan
Tuir Francisca atividade hirak ne'e balun hahú ona dezde 2025 no sei reforsa liu tan ninia implementasaun iha tinan ida ne’e.
Evaluasaun programa merenda eskolar
Durante SMSA ninia monitorizasaun ba Programa Merenda Eskola nota katak eskola sira ne’ebé asesu ba programa ne’e produtu lokal ne’ebé uza ba programa ne’e seidauk atinze 75%.
Produtu lokál balun ne'ebé uza mak na'an karau, batar, modo no koto. Entretantu foos sei importa nafatin. Iha 2025, eskola balun mós sei fó aifuan masan, maske laos produtu lokal.
Kona-ba ijiene, kondisaun sira jeralmente konsidera adekuadu. Maibé, fasilidade sira hanesan fatin haan, dapur, no armazen iha eskola balu la tuir padraun.
Atu rezolve ida ne’e, Diretora ne’e dehan, iha tinan 2026 Munisípiu Dili liu husi programa PNDS sei harii sala haan (refeitório) iha eskola lubuk ida.
SMSA mós nota katak iha eskola balun, estudante sira sei uza troka-malu sasán ba han nian hanesan bikan, kopu, no kanuru.
Maski nune’e, nia dehan, implementasaun jerál ba Programa Merenda Eskolar la’o di’ak, no estudante hotu-hotu iha eskola destinatáriu sira kontinua hetan benefísiu husi programa nasionál ida ne’e.
