Adjunta Kordenador Forsa Tarefas ba Prevensaun no Mitigasaun Surtu Covid-19 iha Timor-Leste, Dr. Odete da Silva Viegas, hatete, munisipiu 9 ho RAEOA la iha ona kazu ativu no munisipiu 3 sei iha kazu esporádiku.

“Ohin kazu rekuperadu laiha. Nune’e, kazu ativu ne’ebé hela iha Izolamentu hamutuk 8,”dehan nia iha komunikadu ne’ebé Online INDEPENDENTE asesu, tersa ne’e.

Ho nune’e, total komulativu kazu konfirmadu sura husi loron 21 fulan-Marsu tinan 2020 to’o 16 Novembru 2021 hamutuk 19.812 no total kazu óbitu hamutuk 122.

Kobertura vasina kompletu (doze 2) iha Timor-Leste tomak, foin atinji 52,6%.

Entretantu, husi horiseik (15/11) mai ohin teste PCR ne'ebé Laboratóriu Nasionál Saúde halo iha Dili hamutuk 83, ne’ebé kompostu husi,  random Screening na’in 29, viájen internasionál na’in 42 no follow up iha kuarentena na’in 12.

Aleinde, teste PCR ne’ebé halo horiseik iha Munisípiu sira seluk, RAEOA no HNGV hamutuk 90.

Iha loron 16 Novembru 2021, Izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu hamutuk na’in 2 ba kazu leve.

Tanba ne’e, SIJK husu ba populasaun iha Timor-Leste laran tomak, maske simu ona vasina kompletu, maibé nafatin respeita regra ba prevensaun no ijiéne individual, ne’ebé Governu hatuur ona, atu prevene moras Covid-19 da’et ba mai.