Husi kazu detetadu 9 ne’e, iha Dili na’in 4, Bobanaro, Vikeke ho Baukau iha na’in ida, inklui RAEOA iha na’in 2.

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, númeru kazu detetadu foun reduz, kompara ho kazu rekuperadu nafatin aumenta.

“Ema ne’ebé halo tratamentu óspitalizadu iha Izolamentu reduz kompara ho loron horseik (14/10), nune’e dadus ne’ebé iha, hatudu munisipiu 6 laiha ona kazu ativu, enkuantu Munisipiu 6 ho RAEOA sei iha kazu esporádiku,”dehan nia iha komunikadu ne’ebé Online INDEPENDENTE asesu, sesta ne’e.

Entretantu, populasaun elejivel iha Kapital Dili ne’ebé simu ona vasina doze kompletu hamutuk pursentu 70 (70%).

Rui esplika, husi totál kazu detetadu foun ohin, kazu 6 mak hatudu sintomas no kazu ida simu ona vasina doze kompletu. Nune’e, kazu ativu ne’ebé iha Izolamentu hela na’in 103.

Totál komulativu kazu konfirmadu sura husi loron 21 fulan-Marsu tinan 2020 to’o loron 15 fulan-Outubru tinan 2021 hamutuk 19.703.

Entretantu, husi horiseik (14/10) mai ohin teste ne'ebé Laboratóriu Nasionál Saúde halo iha Dili hamutuk 36, kompostu husi, Random Screening na’in 18, Viajen internasional na’in 16 no follow up iha kuarentena na’in 2.

Enkuantu, teste PCR ne’ebé halo horiseik iha Munisípiu sira seluk, RAEOA no HNGV hamutuk 163.

Ho nune’e, Izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu hamutuk na’in 8, kompostu husi kazu grave na’in 3, kazu moderadu na’in 4 no kazu leve na’in ida.