Diretór Jerál Sekretariadu Tékniku Administrasaun Eleitorál (STAE), Elviro Fernandes Moniz hatete, eleisaun suku segundu ronde ba suku lima ne’e sei realiza iha loron 13 Maiu, tanba iha eleisaun primeiru volta kandidatu nia votus la atinji liu pursentu 50%.
Nia dehan, suku lima ne’ebé sei avansa ba segundo ronde mak, suku Lequitura husi Munisipiu Aileu, Suku Madohi, Bebonuk no Manleuana husi Munisipiu Dili no Suku Builó Munisipiu Vikeke.
“Agora husi suku Lima ne’e totál eleitor por volta 27.636 sei ba vota tuir dadus ne’ebé hetan husi baze,” dehan Diretór Jerál iha nia knaar fatin Kaikoli, Kinta (02/05).
Nia afirma, fatin votasaun nafatin eziste iha aldeia ida-idak tan ne’e iha suku lima ne’e estabelese sentru votasaun 31, tanba husi suku lima ne’e iha aldeia 31.
Nia salienta katak, Sekretariadu Téknika Administrasaun Eleitoral (STAE), hahú emprime ona bulletin votus hamutuk 30.400 hodi prepara ba eleisaun suku segundu volta. Nia husu ba eleitores sira husi suku lima ne’e atu parstisipa másimu iha eleisaun refere.
Entretantu, suku lima ne’ebé nia Xefe Suku eleitu ona mak suku Bocolelo ho nia aldeia haat (4) Munispiu Aileu, Suku Ailok iha aldeia haat (4) no Mantelolao aldeia neen (6) Munisipiu Dili no Sikone-Diloli iha aldeia rua (2), Laicore aldeia haat (4), uma Kaduak ida (1) munisipiu Manatuto.
Enkuantu, eleisaun ba segundu volta ne’e sei realiza iha loron 13 Maiu ne’e sei hahú iha tuku 09:00 OTL, to’o tuku 15: 00 OTL.