LIKISÁ: Governu Timor-Leste hakarak atu harii Uma Timor (Casa de Timor) iha Portugál hodi apoiu estudante sira iha ne’ebá. Ne’e duni, liu husi reuniaun ho delegasaun Portugál, Ministériu Edukasaun hato'o ona pedidu atu bele realiza planu ne’e.
Ministru Edukasaun, António da Conceição hateten, iha nesesidade ida atu apoia estudante timoroan ne'ebé eskola iha Portugál.
“Ha’u husu ba sira se bele Portugál tenke hanoin iha fatin ida ba timor oan. Ha’u bolu Casa de Timor,” tenik nia, iha Likisá, Sesta (3/2).
Nia dehan, la’ós embaixada maka bolu Casa de Timor, maibé fatin ne'ebé hanesan uluk tempu Indonézia bolu asrama ba estudante sira.
Ne’e duni, Timor-Leste husu para sira bele fó fatin ida iha Portugál atu estudante sira ne'ebé ba eskola sira bele hela iha uma.
Nia dehan, hodi nune’e iha ona akompañamentu besik liu mezmu tempu bele ajuda estudante hamosu nafatin unidade entre sira hanesan timoroan, atu bele hanoin nafatin fila mai Timor.
Iha mós problema seluk ne'ebé estudante balu la’ós estadu maka haruka, maibé husi solidariedade ema portugés balun haruka labarik balun ho programa ne'ebé mai husi RAS no Uniaun Europeia, maibé realidade labarik sira ne’e abandonadu, kestaun ne'e más hato'o iha reuniaun.
