DILI: Polisia Nasionál Timor-Leste (PNTL) Munisípiu Dili sei kontrola estudante Ensinu Pre-Sekundária no Sekundária balun ne’ebé badiu iha oras eskola nian hodi halimar fali iha estrada públiku.
Polítika kontrolu ne’e, PNTL halo atu eduka estudante sira iha dixiplina no badinas ba eskola.
“Hato’o ba inan no aman sira katak, proibidu estudante bandidu iha lurón,” dehan Segundu Komandante PNTL Munisípiu Dili, Euclides Belo durante akompaña diálogu ho Prezidente Repúblika, Taur Matan Ruak iha Administrasaun Munisipál-Dili, Segunda (30/01).
Nia apela mós ba inan no aman sira atu eduka sira nia oan ba eskola hodi labele mete problema oin-oin.
Bainhira membru PNTL halo kontrolu maka hetan estudante balun badiu iha oras eskola nian iha lurón, sei kaer ba entrega iha família.
PNTL sei koopera mós ho autoridade lokál sira para bele kontrola estudante sira bele ba eskola ho di’ak.
