DILI:Atuál Diretór Jeral Ajensia ba Dezenvolvimentu Nasional (ADN), Samuel Marcal troka Xanana Gusmão husi lista kandidatu Ministru Planeamentu Investimentu Estratéjiku (MPIE).
Presidente Repúblika Timor-Leste, Fransisco Guterres Lu ólo aseita Marcal ba Ministru Planeamentu Investimentu Estratéjiku, Alfredo Pires ba Ministru Petróleu no Minerais no Rogério Mendonça ba Vise Ministru Agrikultura no Peska.
Primeiru Ministru Taur Matan Ruak informa lista foun ne’e ba jornalista sira, hafoin hala’o enkontru semananal ba semana dahuluk fulan-Agostu nian ho Presidente Repúblika Lu ólo, iha Palacio Presidensiál, Nikolau Lobato, Dili, kinta ohin.
Xefe Governu ne’e mós informa katak, Prezidente Repúblika aseita ona atu fó uluk posse ba kandidatu membru governu pendente na’in tolu (3) ne’e husi total na’in sanulu resin ida ( 11) ne’ebé mak Xefe Estadu rekuza fó posse.
Xanana rezigna husi lista kandidatu membru VIII Governu Konstutisonál relasiona desizaun Presidente Repúblika ne’ebé pendente nia ema na’in sia (9).
Eis Primeiru Ministru ne’e la partisipa iha sermonia posse dahuluk no daruak ba membru Governu tanba kestaun politika ne’e, no too ikus nia rezigna hodi fó poder ba Primeiru Ministru Taur Matan Ruak hodi nomeia ema seluk.
