DILI: Primeiru-Ministru Singapura, Lawrence Wong to’o ona Díli, Timor-Leste, no simu ofisiál hosi Prezidente Repúblika (PR), José Ramos-Horta ho Primeiru-Ministru Kay Rala Xanana Gusmão, iha Aeroportu Internasionál Prezidente Nicolau Lobato Komoro, kinta (02/07).
Vizita ofisiál ne’e realiza durante loron rua, 2 to’o 3 Jullu 2026 ho objetivu atu hametin relasaun bilaterál entre Timor-Leste ho Singapura, liu-liu iha área kooperasaun ekonomia, investimentu, finansas, edukasaun no dezenvolvimentu institusionál.
Vizita ne’e mós inklui diskusaun kona-bá oportunidade investimentu Singapura iha Timor-Leste, fortalesimentu kapasitasaun institusionál, no expansaun kooperasaun iha seitór prioridade sira hanesan infraestrutura no dezenvolvimentu sustentável.
Durante hela iha Díli, Primeiru-Ministru Singapura sei hala’o enkontru ofisiál ho altas autoridade sira Timor-Leste nian hodi diskute mekanizmu konkretu bá implementasaun kooperasaun bilaterál ne’ebé iha ona.
Governu Timor-Leste konsidera vizita ne’e nu’udár pasu importante ida bá hametin ligasaun diplomátika no ekonómika entre parte rua, no reforsa integrasaun Timor-Leste iha rede kooperasaun rejionál ASEAN.
