DILI: Komisaun Anti Korrupsaun (KAK) ajenda ona atu iha tempu badak halo investigasaun ba Ministériu Komérsiu Indústria (MKI), tanba deskonfia komete irregularidade hasoru benefisiáriu iha partisipasaun ekonomia negósiu.
Komisáriu KAK, Adérito Tilman hateten, haree ba indísiu krime iha aspetu lubuk ida mak MKI Komete. Ne’e duni, tempu badak KAK sei bolu direjente instituisaun ne’e atu investiga.
Tuir nia, tanba instituisaun Governu ne’e iha 2014-2015 aloka orsamentu ba benefisiáriu sira maibé la to’o objetivu ne'ebé iha, nune’e sira mós laiha relatóriu ba MKI.
“Husi aspetu krime ami sei loke investigasaun ba MKI”, dehan Adérito, iha salaun enkontru Ministériu Solidariedade Sosiál (MSS), Kaikoli-Dili, horisehik.
Nia dehan, tanba iha períodu kotuk MKI apoia subvensaun publika ba benefisiáriu hamutuk 158 iha munisípiu 13, ne’ebé halo negósiu ki'ik sira. Governu apoia fundu ba benefisiáriu atu loke negósiu ki'ik, maibé benefisiáriu sira la halo relatóriu ba Governu.
Komisáriu dehan, bainhira iha dokumentu ne’ebé Governu halo ba benefisiáriu sira kuandu KAK identifika indísiu ruma, tenke halo prosesu investigasaun hasoru MKI nune’e mós benefisiáriu sira ne’e.
