AMP Duun PPN Boikota Funsionamentu Plenária Featured

By Jacinto Xavier Janeiru 09, 2018 1273
Lide AMP Lide AMP

DILI: Normalmente servisu Parlamentu Nasionál iha semana ida plenária loron rua Segunda no Tersa. Maibé, iha Segunda (8/1), laiha atividade rotina plenária hanesan baibain.

Haree ba situasaun ne’e, bloku Aliansa Maioria Parlamentár (AMP) duun Prezidente Parlamentu Nasionál mak boikota funsionamentu plenária hodi dada tempu atu atinje sira nia objetivu polítiku.

“Ohin ne’e halo boikota atu halo andamentu funsionamentu parlamentu hodi dada tempu depois mak halo sala ba AMP”, dehan Prezidente Bankada PLP, Fidélis Magalhães, iha Uma Fukun PN, horisehik.

Nia dehan, plenária ne’e obrigatoriamente iha Segunda no Tersa tenke realiza, kuandu halo adiamentu tenke konvoka konferénsia lider bankada sira atu deside ka laiha karik lori ba plenária.

Tanba, iha Parlamentu Nasionál ne’e plenária mak soberania aas liu desizaun hotu-hotu. Tanba ne’e, atu hatún servisu ruma mai iha komisaun espesializada sira atu diskute mós tenke liu husi plenária atu deputadu sira fó nia votu aseitasaun.

Plenária ne’e tuir rejimentu obrigatoriu tenke halo iha kada Segunda no Tersa, maibé kuandu hetan adiamentu sem justifikasaun ne’e prezidente PN rasik kontra ona rejimentu.

Plenária la la’o maibé deputadu husi opozisaun no bloku koligasaun kontinua hein iha sala plenária, maski nune’e la hetan prezensa husi lider órgaun soberania lejizlativa ne’e.

Iha fatin hanesan, hataan ba kestaun ne’e, Prezidente PN Aniceto Longuinhos Guterres hateten, kuandu atu hamosu plenária ida tenke iha konferénsia lider bankada atu halo ajendamentu ba asuntu ne'ebé atu diskute.

“Ohin segunda dia 8 Janeiru laiha plenária tanba laiha ajenda”, dehan nia.

Laiha ajenda ne’e la'ós tanba lakohi atu halo konvokatoriu enkontru lider bankada, maibé tanba foin lalais ne’e PN férias, ne’e duni la konsege halo ajendamentu.

Maibé ba oin sei iha plenária tanba iha ajenda rua ne'ebé sei arkiva mak hanesan mosaun sensura no destituisaun meza PN nian. Seidauk iha projetu lei ka proposta lei ida mai husi governu atu halo diskusaun.

Iha duni proposta lei mai mak Orsamentu Retifikativu ne'ebé mai husi governu, maibé iha Dezembru nia laran xumba ona, tanba ne’e la iha ona ajenda atu diskute. 

Rate this item
(1 Vote)

Independente Digital TV