Inisiativa ne’e hato’o bainhira delegasaun husi Xina hasoru malu ho Ministru Agrikultura Pekuaria, Peskas no Floresta, iha edifisu MAPPF, Komoro, Dili, segunda ne’e (17/11).

Ministru Agrikultura, Pekuaria, Peska no Floresta (MAPPF), Marcos Mameta da Cruz hatete, delegasaum husi Xina deskute setór haat, ne’ebé sai pilar importante hodi aumenta produsaun iha rai laran.

"Ohin, ita hasoru malu ho delegasaum husi Xina deskute, atu halo investimentu iha setór agrikultura, pekuária, Peska no Floresta, ne'ebé sira interese atu hare'e asuntu sira ne'e ho posibilidade atu hasa'e produsaun iha rai laran,” dehan nia ba Jornalista sira iha salaun MAPPF, Comoro, (17/11/25).

Ministru Marcos dehan, Timor-Leste nasaun ida kiik hodi dezenvolve-aan iha área potensial sira, maibé Xina mós hakarak atu halo investimentu iha setor agrikultura, pekuária, peska no floresta.

Nune’e, Ministru haktuir, delegasaun husi Xina haree katak, setór haat ne’e nu’udar oportunidade ba sira atu investe, tanba sira iha esperensia kona-ba setór haat ne'e no sira hakarak dezenvolve setór peska iha tasi laran no mós dezenvolve setór sira seluk ne'ebé iha.

"Ha'u esplika ba sira katak loron seluk mai fali hodi explora ho sira nia interese, nune'e mós hakarak investe ba setór sira ne'e, tanbá Governu Timor-Leste servisu hamutuk ho Governu Xina tinan barak kona-ba setór agrikultura no sira seluk,”tenik nia.

Entretantu, Governante ne’e haktuir, Xina iha esperensia makas atu dezenvolve setór agrikultura, pekuaria, peska no floresta, tanba ne’e Timor-Leste pesiza aprende barak husi Xina kona ba hasa’e produsaun rai laran, hodi atinji seguransa ai-han no mós setór seluk tan.