Governu liu husi DNTT fó sai tarefa ba mikrolete diresaun Komoro hanesan estudante selu 0,15 no pasajeiru bain-bain 0,25 sentavu.

Diretór Jerál DNTT Natalino do Rosário hatete, mikrolete 03.010 no 011 greve tanba pasajeiru sira  selu la tuir tarefa ne'ebé governu fó sai.

 “Ami prepara hela para avizu atu fó sai liu husi média sira no ha'u haree loos duni transporte públiku sira la uza konjak entaun pasajeiru sira tun selu tuir sira nia hakarak,”dehan nia iha kna’ar fatin-Balide,horisehik.

Iha fatin ketak, portavós Kondutór Mikrolete Justino Cabral hatete, ohin (27/04) mikrolete hahú halai maibé pasajeiru sira kontinua la selu tuir tarefa sei greve durante fulan tolu.

 “Ami mogok tanba pasajeiru sira selu la tuir desizaun tarefa governu katak pasajeiru baibain selu $0,25 no estudante sira maka selu $15 sentavu,” dehan   nia ba INDEPEDENTE iha terminál- tasi tolu.

Motorista mikrolete 010 diresaun Tasi Tolu-Bidau  Carlito Barreto dehan, halo greve tanba pasajeiru sira selu kareta tuir nia hakarak de'it.

Motorista mikrolete 03 no 011 diresaun bekora no kaikoli Delvin Pinto no José Silvano dos Santos sente triste bainhira pasajeiru sira kontinua selu la tuir tarifa ne’ebé governu fó sai.

Entertantu, Estudante Universidade (UNTL) Gisela Guterres sente preokupadu tanba durante loron rua mikrolet greve difikulta atividade eskola nia.

“Ami selu kustu ba Mikrolete ne’e tuir duni regras maibé dala balun Mikolete rasik viola, ami fó osan  $0.25 sentavu la fó fila osan resin”, lamenta nia.

Estudante (UNPAZ) Flora Lopes hatete, Motorista Mikrolet sira laiha razaun forte Atu halo greve tanba dala barak sira viola regra hodi husu estudante selu 0,25 sentravus.