Diretór Administrasaun Finansas no Lojístika, HNGV Mendes Pinto hateten, sasán HNGV ne'ebé tau hela iha mortuáriu oin tanba armazein laiha. Sasán ne’e ospitál la uza ona hanesan kama, armáriu, kadeira, motór no karreta aat.

“Ministériu saúde atu mai foti ba hadi’a hodi suporta fali sasán ba iha área rurál, maibé la konsege”, dehan nia, iha knaar fatin, Bidau-Dili, horisehik.

Tuir nia, sasán ne’e haree ba ladún di'ak, impede ema nia movimentu. Tanba ne’e, HNGV halo ona lista ba Estadu atu haruka ba patrimoniu estadu sasán ne’e pertense nasaun nian.

Karta no lista ne’e ba ona, maibé HNGV seidauk hetan resposta, ne'ebé hein de’it bainhira mak foti mobiliáriu hirak ne’e.

Ekipamentu uzadu hirak ne’e foti husi salaun hotu-hotu iha HNGV. Balun hadi'a di'ak sei kontinua utiliza, maibé sira ne’ebé la bele aproveita sei entrega ba Estadu.