Print this page

Apaga “Laran Moras” iha Moru Kuluhun Featured

By Tome Amando Fevereiru 13, 2019 5659
Ilustrasaun pinta didin. FOTO: tipsajbs.blogspot.com Ilustrasaun pinta didin. FOTO: tipsajbs.blogspot.com

DILI: Espresaun laran moras ne’ebé dezeña kuaze moru no paredi sira iha Kuluhun hatudu sentimentu lakon ne’ebé profundu ne’ebé familia no kolega sira husi vitima Kuluhun sente hafoin pesoal polisia tiru mate joven na’in tolu iha 16 Outubru 2018.

Kuaze iha moru no paredi hirak iha Kuluhun hakerek lia-fuan insultu hasoru instituisaun Polisia Nasionál Timor Leste.

Familia sente laran moras tebes tanba pesoal PNTL na’in rua ne’ebé deskonfia tiru mate joven na’in tolu, Kevin Saldanha (18), Leonildo Eduardo Xavier (20), no Erick Jhony Ribeiro (20), sei iha relasaun familia no hela duni iha Suku Bidau Akadiruhun.

Atu hamoos moru hirak ne’e, PNTL halo aprosimasaun ba familia vitima ne’ebé mate no vitima na’in lima ne’ebé hetan kanek. Ikus mai, familia vitima sira konkorda hodi hamoos lia-fuan hirak ne’ebé hakerek.

Komandante Unidade Espesial Polisia (UEP), Superintendenti Afonso de Jesus hatete, asaun hamoos lia-fuan iha moru no paredi ne’e atu iha futuru labele akontese tan.

Tuir nia, lia-fuan ne’ebé mak defama institiusan PNTL ne’e la loos no la di’ak tanba asaun krime ne’e pesoal mak halo, no daudauk ne’e prosesa ona.

“Ha’u hanoin buat sira ne’ebé mak komunidade sira hakerek ne’e la tuir ninia dalan, tanba pesoal ida mak halo maibé refere fali ba instituisaun PNTL, ida ne’e mak la loos,” dehan nia ba jornalista sira iha Kuluhun, Segunda (11/02).

Ho razaun ne’e, ekipa UEP sei hamoos no pinta foun fali moru hirak ne’ebé hakerek lia-fuan insultu nune’e Kapital Dili bele sai sidade moos no furak.

Rate this item
(0 votes)