Print this page

TL-Austrália Finaliza Diskusaun Finál Fronteira Marítima Featured

By Eugenio Pereira Fevereiru 24, 2018 5328
Ekipa Negosiasaun Fronteira Maritima Timor-Leste no Australia Ekipa Negosiasaun Fronteira Maritima Timor-Leste no Australia

DILI: Ekipa Governu Timor-Leste no Austrália, Sesta (23/2), horisehik, finaliza ona diskusaun finál ba testu akordu fronteira marítima, iha Kuala Lumpur Malázia.

Diskusaun ne’e kontinua fasilita husi Prezidente Komisaun Konsiliasaun Embaixadór, Peter Taksøe-Jensen (Dinamarka). Nune’e, sira seluk ne’ebé halo parte ba ekipa ne’e maka Rosalie Balkin (Austrália) Juíz Abdul G. Koroma (Serra Leoa) Profesór Donald McRae (Kanadá no Zelándia-Foun) no Juíz Rüdiger Wolfrum (Alemaña).

Husi Timor-Leste nian marka prezensa husi, Xefe Negosiadór Fronteira Marítima, Kay Rala Xanana Gusmão no ekipa Gabinete Fronteira Maritima no parte advogadu Timor-Leste.

Tuir planu, akordu finál husi diskusaun ne’e sei entrega ba Sekretáriu Jerál Nasoins Unidas (ONU), António Guterres, hodi asiste nasaun rua asina finál iha loron 6 Marsu 2018.

Governu Austrália hato’o ona agradesimentu ba ekipa negosiadór Timor-Leste, Xanana Gusmão ne’ebé koopera di’ak ho Austrália hodi diskute problema nasaun rua.

Agora ami remata ona reuniaun ikus kona-ba fronteira marítima ho Timor-Leste, inklui mós Greater Sunrise nian. Husi delegasaun Austrália nian hakarak hato’o ami nia agradesimentu boot ba kolega Timoroan hotu, ne’ebé dirije husi Xefe Negosiadór Xanana Gusmão, no Komisaun Konsiliasaun Nasoins Unidas nian ne’ebé servisu hamutuk ho ami hodi atinji rezultadu importante ida ne’e. Ami hein atu asina akordu fronteira marítima nian iha Novaiorke”, dehan Governu Austrália, liu husi facebook ofisial Australia in Timor-Leste, ne’ebé diáriu ne’e asesu.

Antes ne’e, Xefe Negosiadór Fronteira Marítima, Xanana Gusmão konfia rezultadu negosiasaun fronteira marítima fó vitória boot ba Timor-Leste.

Xanana dehan, Malázia sai fatin marka istória foun ba Timor-Leste no Austrália nu’udar fatin atu deside problema ne’ebé nasaun ruma buka rezolve tuir direitu internasionál.

Iha Timor, (imi povu) kontinuasaun ami nia apoiu ho orasaun ba luta ida ne'e, ne'ebé besik hakat ba rohan. Ami nafatin tau fiar no serteza katak funu ba Fronteira Marítima funu ho kakutak”, tenik Xanana.

Entretantu, Ministru Negósiu Estranjeiru no Kooperasaun (MNEK), Aurélio Guterres informa, governu kontinua hein rezultadu negosiasaun ne’ebé halo husi Maun Boot Xanana Gusmão ne’ebé deside iha Malázia.

Rate this item
(0 votes)