Kuarta, 13 Novembru 2019 | Login
Taur matan ruak Taur matan ruak

Loron 30 Agostu TL-Austrália Tenki Ratifika Tratadu Tasi Timór Featured

DILI: Primeiru Ministru Taur Matan Ruak aseita ho pedidu Xefe Negosiadór Delimitasaun Fronteira Marítima, Kay Rala Xanana Gusmão hodi hato’o pedidu ba Parlamentu Nasionál (PN) atu ratifika dokumentu Tratadu Tasi Timor entre Timor-Leste ho Austrália, iha loron 30 Agostu 2019.

“Tratadu ne’e ita prepara loos, bele asina iha iha 30 de Agostu, maski maun Xanana servisu makas loos, Governu mós servisu makas no ita nia Parlamentu Nasionál sei apoia ita no Na'i Prezidente mós sei apoia ita parke kusta susar too ne’ebé 30 de Agostu (2019) tenki asina,” dehan Taur ba jornalista iha Parlamentu Nasionál, horisehik.

Akordu Fronteira Maritima ne’e rasik asina ona husi Ministru Adjuntu Primeiru Ministru ba Asuntu Fronteira Sira, Hermenegildo Agio Pereira no Ministra  Estranjeiru Austrália, Julie Bishop asina ona akordu fronteira maritima asiste husi Sekretáriu Jerál ONU, António Guterres no Prezidente Komisaun Konsiliasaun  Embaixadór, Peter Tasoe-Jense iha Estadus Unidas Amérika iha loron 6 de Marsu 2018.

Taur dehan, agora daudaun PN hahú halo ona preparasaun hodi bele simu dokumentu ofisial husi Governu atu bele diskute no ratifika.

Antes ne’e, Prezidente PN, Arão Noe de Jesus hatete, sira sei halo ajenda hodi ratifika atu bele em vigor, antes 30 Agostu 2019, tanba Austrália rasik disponivel ona atu ratifika. Ne’e duni, Timor-Leste mós sei la’o tuir, inklui halo alterasaun ba lei tolu.

“Ami hein governu atu halo aprezentasaun kona-ba ratifikasaun no alterasaun ba lei tributária, lei atividade petrolífera no lei fundu petrolíferu nian atu halo alterasaun no ajusta fali”, dehan nia, iha Palásiu Prezidensiál, Bairru-Pité foin lalais ne’e.

Entretantu Governu Austrália mós iha faze preparasaun ona, tanba ne’e iha semana ne’e sira komesa ona prepara ekipa komisaun eventuál ida ba apresiasaun.

Dokumentu definisaun fronteira marítima entre Timor-Leste no Austrália ofisialmente asina ona iha Novaiorke 6 Marsu 2018, nune’e agora daudaun hein ratifikasaun husi Parlamentu nasaun rua nian atu bele em vigor.

Antes ne’e, Bankada opozisaun FRETILIN iha Parlamentu Nasionál prontu ratifika tratadu fronteira marítima ne’e, maibé presiza kooperasaun Governu nian atu fasilita uluk dokumentu atu estuda.

Read 1052 times
Rate this item
(0 votes)
MidAd1