Ho serteza mós, iha Segunda (25/02), Kalbuadi hato’o pedidu ba Parlamentu Nasionál atu retoma fali pozisaun nu’udar deputadu. Iha loron ne’e kedan, deputadu sira iha Parlamentu Nasionál aprova pedidu husi Kalbuadi ne’e no automatikamente, Kalbuadi sai fali deputadu iha Parlamentu Nasionál. Planeadu ka lae? So nia, nia grupu no Maromak mak hatene.
Hafoin Kalbuadi sai deputadu, prosesu atu dada nia ba tribunal hodi hataan ba kazu ne’ebé kondena ba nia sei naruk. Hanesan mós ho prosesu ba eis Prezidente Parlamentu Nasionál Vicente Guterres ne’ebé dada ba-mai no ikus mai PN la hasai ninia imunidade to’o nia mandatu remata. Eis Prezidente PN ne’e mai mós husi Partidu CNRT. Sistematiku ka lae? So sira no Maromak mak hatene.
Ba kazu Vicente, Tribunal Munisipiu Dili liu husi Juiz Prosesu hato’o karta hodi halo levantamentu ba imunidade fila fila ba Parlamentu Nasionál. Maske deputadu sira deklara prontu atu hasai imunidade husi Vicente no Vicente rasik deklara prontu ba hatan iha tribunal no hatete “prizaun ba ema mane, la’os ba animal”, maibé realidade hatete oin-seluk.
Esperensia ne’e atu hanesan mós ho saida mak mosu daudauk. Deputadu sira no atual Prezidente Parlamentu Nasionál Arão Noe rasik deklara prontu atu prosesa hodi hasai imunidade Kalbuadi bainhira simu karta husi tribunal.
Iha ninia deklarasaun ba jornalista sira iha Kuarta (27/02) liu ba, Arão hatete: “Kalbuadi Lay la subar aan iha imunidade nia okos tanba prosesu la’o, pedidu tama mai prosesu sei la’o, Prezidente PN baixa ba komisaun A halo pareser mai Prezidente PN haruka ajenda plenaria, plenaria mak sei deside.”
Saida mak sai kestaun? Prontidaun iha ona no (karik) Kalbuadiu sei la halai hanesan ho eis Ministra Finansas Emilia Pires, maibé se hakarak duni atu hasoru justisa tanba sa mak tenke ba subar fali iha imunidade nia okos?
PN rasik iha tempu hirak liu ba perna foti ona desizaun hodi autoriza ninia deputadu na’in rua husi bankada PD, Mariano Assanami Sabino no Antonio da Conceicão, hodi ba hatan iha tribunal, maibé tanba sa mak kazu hasoru deputadu balun husi bankada CNRT (la sura ho eis Prezidente PN Aderito Hugo) hanesan defisil tebes atu foti desizaun?
Karik ema sira ne’e labele atu kaer kona (tak bisa disentuh), karik mós tanba la iha autorizasaun husi ‘Maun Boot’, ka karik mós hanesan deklarasaun balun ne’ebé fó fali todan ba Ministériu Públiku no PNTL tanba konsidera laiha kapasidade?.
Prosesu sei la’o no ita sei akompaña to’o rohan hodi bele haree saida mak mosu iha ne’ebá !!!