PN Prepara Planu Sosa Karreta Foun Featured

By Jacinto Xavier Setembru 16, 2018 6515

DILI: Parlamentu Nasionál liu husi Konsellu Administrasaun Parlamentár iha ona hanoin atu sosa karreta foun 65 ba deputadu sira. Planu ne’e sei prevé iha Orsamentu Jeral Estadu 2019 nian.

Sekretáriu Jerál Parlamentu Nasionál, Adelino Afonso de Jesus hatete, orsamentu ba sosa karreta foun ba deputadu sira ne’e la orsamenta iha 2018 maibé sei ba hatama OJE 2019.

Tuir nia, iha planu Parlamentu Nasionál ne’e nian sei halo akizasaun ba karreta hamutuk 65, maibé seidauk bele deside marka karreta nian.

Nia hatutan, problema karreta Prado ne’ebé durante ne’e públiku sempre kestiona ne’e enkontru entre Konsellu Administrasaun Parlamentár no Prezidente PN manda ona karta dala tolu ba eis deputadu III lejizlatura sira atu mai entrega karreta Prado ne’e.

Antes ne’e, Konsellu Administrasaun Parlamentár haruka ona karta ba eis-deputadu lejizlatura datoluk (III) nian hodi hatama karreta Prado. Maibé to’o oras ne’e seidauk hatama hotu.

Tanba ne’e, Parlamentu Nasionál (PN) liu husi Konsellu Administrasaun PN deside atu uza forsa hodi rekolla hotu karreta Prado PN nian, ne’ebé eis-deputadu sira kontinua asegura hela iha uma.

Presidente PN, Arão Noe de Jesus hatete, seidauk iha desizaun sosa karreta foun ba deputadu sira, maibé desizaun finál ne’ebé Konsellu Administrasaun PN atu rekolla karreta tuan ne’ebé eis-deputadu sira uza maibé seidauk entrega.

Konsellu Administrasaun PN manda ona karta dala tolu ba eis-deputadu sira atu mai hatama karreta, ne’e duni iha karta datoluk ne’e kontinua la entrega maka sei foti asaun konkretu.

“Karik eis-deputadu sira ne’e mak kontinua la mai entrega nafatin, iha dalan rua ne’ebé ami sei halo. Liu husi prosesu judisiál no sei husu ba Polisia atu foti asaun”, dehan nia.

Entretantu, rejistradu iha Diresaun Nasionál Transporte no Terrestre (DNTT) karreta Prado PN ne’ebé muda ona xapa matríkula Estadu nian ba privadu hamutuk 53.

Maibé, hataan ba ida ne’e, Prezidente PN dehan, maski nune’e sein kontinua aviza ba eis-deputadu sira ne’e atu entrega hotu karreta hirak ne’e.

Desizaun ne’ebé halo ne’e kontinuidade husi III no IV lejizlatura nian ne’ebé deside kansela ona prosesu leilaun, tanba ne’e la halo ona desizaun foun.

Ne’e duni, V lejizlatura halo ona desizaun atu dada fila karreta tuan sira hodi entrega ba deputadu sira atu uza halo servisu.

Rate this item
(0 votes)

Independente Digital TV