Diretór Jerál STAE, Acilino Manuel Branco hatete, ekipa sira atu husik Timor iha loron 8 fulan Agostu bainhira rezultadu eleisaun sai ona.

Nune’e, sira mós halo ona kontaktu ho MNEK katak iha mós maluk balun husi ASEAN nian integra iha rede eleitorál ASEAN iha ona kontaktu para atu mai observa.

“Ha’u haree esperiénsia Prezidensiál ninian observadór internasionál hamutuk rihun ida, maibé ho pedidu foun balun ne'ebé ami simu ona ita espera katak sei fó sai iha tempu badak nia laran”, dehan nia, iha Hotel Nuvo Turismo, horisehik.

Tuir nia, observadór internasionál sira ne’e mai husi nasaun sira ne'ebé integra-aan iha Uniaun Europeia sira nia reprezentante.

Kona-ba prosesu ne’e lei garante sei di’ak tebes no povu mós partisipa, kontajen manuál ne'ebé iha nasaun, maibé sei iha sistema ida atu garante transparente ba públiku tanba nia sistema funsionamentu bele asegura prosesu no mós evita preokupasaun balun.

“Sistema ne’e sentrál maibé ita dezenvolve ba iha sistema sira ne'ebé ita estabelese ba iha munisípiu no mós sentru sira iha rai li'ur hodi tranzmite rezultadu liu husi sentru ne'ebé iha sai tema nasionál ida hodi fó sai média komunikasaun sosiál sira hodi ema hotu asiste prosesu eleisaun ne’e”, dehan Acilino.

Nia dehan, mekanizmu kontrolu sei iha koneksaun direta ho televizaun Estadu nian hodi bele halo apuramentu dadus ne’ebé tranzmite diretamente.