Print this page

MUTL Ameasa Hapara Sosa Karreta Foun PN Featured

By Estajiariu Fevereiru 20, 2019 5366

DILI: Movimentu Universitáriu Timor-Leste (MUTL) ameasa hapara sosa karreta foun ba Parlamentu Nasionál bainhira la responde ezijénsia sira-nian hodi husu audiénsia.

Portavós MUTL, Jonhes Chege hatete, PN bele hola karreta foun ba deputadu foun sira, maibé tenke halo uluk audiénsia entre bankada parlamentár ho MUTL.

Tanba ne’e, MUTL haruka ona karta ba Parlamentu Nasionál no hein loron haat nia laran atu halo audiénsia foin bele sosa karreta foun.

“Parlamentu Nasionál la konsidera pedidu ne’e maka MUTL sei halo asaun kansela sosa karreta foun ba deputadu sira”, dehan Jonhes, iha Kampus Sentrál UNTL, horisehik.

Nune’e, karreta ne’ebé eis-deputadu sira uza leilaun ho folin rihun $8 ne’e eis-Prezidente Parlamentu Nasionál (PN), Aniceto Guterres, hasai ona karta despaxu kanselamentu hodi devolve fali osan, maibé karreta hirak ne’e to’o agora seidauk entrega hikas.

Tanba ne’e, bainhira lakohi halo audiénsia tuir karta ne’ebé MUTL haruka maka sei halo fali karta ba iha parte seguransa hodi mobiliza massa tuun direta ba iha eis-deputadu sira-nia rezidénsia foti patrimóniu Estadu ne’e.

Ne’e duni, deputadu foun sira tenke hasai rezolusaun hodi hola karreta foun ba deputadu tenke foti uluk karreta ne’ebé eis-deputadu leilaun, hodi fó fali ba instituisaun seluk bele uza halo servisu.

Entretantu, Parlamentu Nasionál (PN) hahú prosesa ona tenderizasaun ba akizasaun karreta foun 65 ba membru lejizlatura foun sira atu uza hodi hala’o servisu fiskalizasaun.

Prezidente PN, Arão Nóe de Jesus hateten, Orsamentu Jerál Estadu (OJE) tinan fiskál 2019 promulgadu ona, konserteza orsamentu privativa PN nian mós tama ona iha ezekusaun nian.

Prosesu ba sosa karreta foun ba deputadu eleitu na’in 65 mós agora prosesu administrasaun la’o hela.

“Hein de’it prosesu administrasaun sei la’o hela”, dehan nia, iha Uma Fukun PN, horisehik.

Arão hatete, karreta Prado tuan sira agora sei iha hela prosesu laran, tanba Konsellu Administrasaun hato’o ona karta dala tolu ona ba eis-deputadu sira maibé laiha resposta ruma.

Tanba ne’e, entidade hotu-hotu hein de’it Parlamentu Nasionál sei buka meiu hodi rezolve asuntu ne’e ho neineik.

Antes ne’e, iha tinan kotuk Parlamentu Nasionál diskute ona hodi prevé osan atu halo rekizisaun sosa karreta foun ho marka Mitshusibhi Pajero hamutuk unidade 65 hodi fasilita deputadu ida-idak.

Laiha konfirmasaun klaru kona-ba tipu karreta ho marka Pajero ne’e, maibé osan ne’ebé tau hamutuk $2.665.000. Signifika kada karreta foun ne’e sei ho folin $41.000.

Tuir lista presu karreta Mitshubishi Pajero tinan 2018 ho folin variedade konforme ninia tipu. Presu tuun liu maka Mitshubishi Pajero Sport Dakar 4X2 A/T folin $35.400, Pajero Sport 4X2 Ulimate AT folin $36.933, Pajero Sport 4x2 Ultimate Quartz White Pearl AT folin $37.133, no Pajero Sport Dakar 4x4 A/T folin $44.200.

Rate this item
(0 votes)