Governu Garante sei La Akontese EA Featured

By Artur da Luz Agostu 08, 2018 7806
Fidelis Magalhães Fidelis Magalhães

DILI: Ministru Reforma Lejizlativa Asuntu Parlamentár, Fidelis Magalhães, sente impase polítika ne’ebé Xefe Estadu, ho Xefe Governu seidauk iha solusaun ba kandidatu membru Governu sei la afeta eleisaun antesipada.

Prezidente Repúblika aprova ona kandidatu membru Governu balun ne’ebé tempu badak atu simu pose mak Samuel Marçal nu’udar Ministru Planeamentu Investimentu Estratéjiku (MPIE), Alfredo Pires ba Ministru Petróleu no Rekursu Minerais (MPRM), Rogério de Araújo Mendonça asume kargu Vise Agrikultura no peska (VMAP).

Nune’e, kandidatu membru Governu seluk kontinua pendente, maibé Xefe Governu kontinua mantein pozisaun atu lori kandidatu sira ne’e atu simu pose, tanba kandidatu sira ne’e eleitu husi partidu polítiku.

Tan ne’e, Fidelis dehan, Governu garante eleisaun antesipada la akontese bainhira Xefe Governu ho Xefe Estadu laiha solusaun ba lista ne’ebé pendente.

“Ha'u rona katak eleisaun antesipada ne’e fantazia ne’ebé imajinasaun ho kriativu mais ne’e la loos,” dehan nia, iha Uma Fukun PN, horisehik.

Garante eleisaun antesipada sei la akontese tanba partidu ne’ebé hetan asentu iha PN mak CNRT, PLP ho KHUNTO ho maioria 34 kadeira, nune’e FRETILIN ho kadeira 23 nune’e Partidu Demokrátiku (PD) kadeira 5, ne’e duni Governu ne’e forsa tanba apoia husi deputadu 34.

Fidelis dehan, Governu ne’e iha podér dura hodi ukun povu ho nasaun ne’e to’o mandatu tinan lima, hodi rezolve ezijénsia povu ho estadu bazeia ba programa Governu nian ne’ebé pasa iha PN.

Tanba ne’e, Governante ne’e kontinua husu ba populasaun timoroan tomak labele fiar rumor sira ne’ebé espalla iha públiku atu sobu estabilidade Governu no nasaun.

 

Rate this item
(0 votes)

Independente Digital TV