Aprezenta Programa Ba Povu FRETILIN-PD La Hanoin Hadau Votu Featured

By Artur da Luz Janeiru 18, 2018 1244
Matias Boavida Matias Boavida

DILI: Governu lori programa hakbesik aan ba povu iha baze atu komunidade sira iha munisípiu bele intende didi’ak kona-ba ninia implentasaun no benefísiu.

Maski nune’e, bloku opozisaun Aliansa Maiória Parlamentár (AMP) konsidera Governu lori programa tuun direta ba baze nu’udar planu ida atu hadau votu.

Hataan ba kestaun ne’e, Sekretáriu Estadu Konsellu Ministru, Matias Boavida Freitas hateten, pozisaun VII Governu nian aprezenta programa ba komunidade sira iha munisípiu la’ós atu buka votu.

Maibé, aprezentasaun programa ne’ebé hetan ona rejeisaun husi opozisaun sira ba povu, tanba konstituisaun fó dalan ba Governu.

“Ami aprezenta programa ne’e ba povu la’ós atu hadau votu, tanba ne’e opozisaun sira labele ta’uk, husik povu mak determina”, dehan Matias, iha Palásiu Governu, horisehik.

Nia hatutan, di’ak liu deputadu opozisaun sira ida-idak halo servisu nu’udar ema polítiku, tanba programa ne’ebé hetan rejeita tenke lori to’o baze hodi povu komprende di’ak liután kona-ba planu sira ne’e.

Ne’e duni, Matias dehan, VII Governu husu ba bloku AMP sira labele laran taridu, ne’e la’os maneira atu hakbesik aan ba povu hodi hetan votu konfiansa bainhira mosu eleisaun antesipada.

Nia hatutan, bainhira Governu ne’e hakbesik aan ba povu, la’ós atu hamaus povu nia laran hodi hetan votu. Governu hakarak esklarese didi’ak programa ne’ebé hetan ona rezeisaun husi opozisaun sira.

Iha fatin hanesan, Ministru Adjuntu Primeiru Ministru asuntu Governasaun, José Maria dos Reis hatete, programa ne’e tenke sosializa ba povu sira bainhira iha Parlamentu Nasionál ulun moras ona.

Tuir nia, to’o oras ne’e maturidade povu nian matenek ona. Ne’e duni dalan di’ak mak entrega fali ba povu atu hili tuir nia hakarak, tanba povu nia votu mak determina futuru nasaun nian.

Tanba ne’e, dalan di’ak mak eleisaun antesipada atu determina loloos povu nia diretu ba partidu ida ne’ebé hetan konfiansa iha eleisaun hodi ukun nasaun ne’e iha periódu tuir mai.

Rate this item
(0 votes)

Independente Digital TV