Print this page

Xanana: FRETILIN iha Papel Importante iha Luta ba FM Featured

By Florencio Ximenes Abril 29, 2019 2090
Xanana ho Alkatiri Xanana ho Alkatiri

DILI:  Prezidente  Partidu Kongresu Nasionál Rekonstrusaun Timor Leste (CNRT), Xanana Gusmão rekoñese papél importante partidu FRETILIN  iha prosesu luta ba Fronteira Maritima (FM) hasoru Australia.

Eis Prezidente Repúblika, eis Primeiru Ministru, no atual Reprezentante Espesiál Timor-Leste ba Kestaun Petrolífera, Xanana Gusmão hato’o kestaun ne’e liu husi ninia mensajen ne’ebé nia hato’o ba kuadrus no militante partidu CNRT iha selebrasaun aniversariu CNRT ba tinan 12 ne’ebé monu iha 27 Abril.

Tuir Xanana, FRETILIN hola papél importante tanba aseita hodi hola parte iha V Governu Konstitisuonál hamutuk ho CNRT hodi luta hasoru Austrália kona-ba fronteira tasi.

“Ita hotu bele la’o hamutuk ho hanoin ida de’it, hakarak ida de’it  no hahalok ida de’it  to’o alkansa vitoria boot hasoru Austrália kona-ba ita-nia fronteiratasi hodi kaer ita-nia rikusoin iha tasi laran,” dehan Xanana liu husi gravasaun filmajen ba kuadrus CNRT, iha Sede CNRT, Bairru Grillus, Sabadu (27/04).

Lori partidu CNRT nia naran, Xanana fó obrigado ba partidu FRETILIN tanba bele hamutuk atu defende interese nasionál ne’ebé aas liu duke interese partidu idak-idak nian.

Xanana konsidera FRETILIN hamutuk ho CNRT hanesan lisaun di’ak no ezemplár tebes  ne’ebé akontese ba prosesu konstrusaun estadu  no konstrusaun nasaun.

Aleinde ne’e, Prezidente CNRT mós rekorda nia saudades ba partidu parseiru sira seluk ne’ebé hamutuk  iha IV Governu no V Governu Konstitusionál hanesan Partidu Demokrativu (PD), ASDT,  PSD, UNDERTIM, Frente Mundansa, no PST.

“Obrigadu ba imi-nia parseiru, tanba iha tempu defisil  imi hakarak hamutuk ho CNRT  hodi esforsu atu harii aliserse ba konstrusaun ita-nia nasaun, CNRT sei la haluha imi,” dehan Xanana.

CNRT Tenke Rekoñese Frakeza

Iha ninia mensajen, Prezidente CNRT ne’e husu mós ba kuadrus no militante partidu CNRT atu tenke sinseriu, onestu no nakloke hodi rekoñese frakeza.

Tuir Xanana, ida ne’e fundamental tebes ba futuru partidu CNRT nian.

“Ita la haree didi’ak ba aspetu sira ne’e ita sei la hetan konsensia atu hadi’a partidu nia uma laran no sei la sente nesesidade atu hadi’a ita aan rasik nu’udar kuadru ka militante,” dehan nia.

“Ita la halo interonpeksaun ne’e nia tendesia mak ita hatudu liman ba maluk seluk no organizasaun seluk inklui ita-nia tendensia monu ba loko aan de’it hodi ezije de’it ba ita-nia direitu, haluha ita-nia dever ba nasaun.”

Tanba ne’e, husu ba kuadru no militante CNRT tomak atu kontinua fiar aan la’o ba oin hodi fó kontribuisaun ba estadu no nasaun hodi fó mundansa ba povu nia moris husi kiak no mukit.

Hahú iha tinan 2007 to’o 2017, Partidu CNRT mós halo ona mudansa balun liu husi eletrisidade, agrikultura, turizmu, ekonomia no seluk tan, maibé CNRT mós konsiente katak la’ós halo mesak de’it.

Entertantu, Sekjen Partidu CNRT, Francisco Kalbuadi Lay fó parabéns ba kuadru no militante partidu CNRT nian iha kada munisípiu hodi kontinua esforsu hamutuk atu dezenvolve nasaun no rai ida ne’e.

Aniversariu ba dala-12 ne’e, nia dehan, kuadru partidu CNRT iha nasionál tuun hotu ba munisípiu sira atu selebra hamutuk ho militante sira.

Rate this item
(1 Vote)

Related items