Negosiante Angelina Soares (65) ne’ebé faan sasán iha Merkadu Manleuana hatete, bainhira moras Corona Virus (Covid-19), seidauk mosu no la aplika Estadu Emerjensia (EE), sasán sira hanesan, modo, kotes, fehuk ne’e ema sempre sosa lor-loron.

"Ha'u habai aan de’it iha loron manas hodi faan, maibé la iha ema atu sosa produtu ne’ebé ha’u faan, uluk loron ida ha’u hetan osan U$20 kada loron, maibé agora ne’e dalaruma maka ha’u hetan U$5 kada loron,” dehan nia, iha Merkadu Manleuana, horisehik.

Nia informa, situasaun kuandu la’o nune’e nafatin moris familia liuliu negsiante sira nian sai pior liután, agora daudaun  ne’e eskola atu hahú tama fali ona, labarik sira nia presiza no nesesidade familia lor-loronsa sai naha boot ida atu tutur hodi ultra pasa.

Tanba ne’e husu ba governu atu reativa lalais ekonomia rai laran atu nune’e povu kiik sira bele hetan rendimentu hodi sustenta familia.

Iha fatin hanesan negosiante husi Munisipiu Baukau, Mateus Filipe (47) ne’ebé faan iha Merkadu Manleu hatete, durante moras Covid-19 tama Timor husi ne’e kedas komprador la iha ona atu mai sosa sasan, iha Estadu Emerjensia dahuluk, daruak no ba datoluk ne’e kuaze hanesan de’it.