Ronda Dialogu Ikus PR Lu Olo ho Parpol: EA Tenke sai Obsaun Ikus Liu Featured

By Cristina Ximenes Janeiru 30, 2020 3099
Presidente PD ho nia kuadrus tomak hasoru Presidente Republika hodi koalia kona-ba situasaun politika atual. Foto INDEPENDENTE Presidente PD ho nia kuadrus tomak hasoru Presidente Republika hodi koalia kona-ba situasaun politika atual. Foto INDEPENDENTE

DILI: Ronda dialogu “parte dahuluk” Prezidente Repúblika Francisco Guterres Lu Olo ho partidu politiku (Parpol) sira remata ho enkontru ho Partidu Demokratiku (PD) no Partidu Unidade Dezenvolvimentu Demokratiku (PUDD).

Hafoin ronda dialogu ho Parpol remata, PR Lu Olo sei kontinua hala’o ronda dialogu ho grupu jurista, no sosiadade sivil sira.

Parpol hotu-hotu ne’ebé halo enkontru ho PR Lu Olo entrega tomak ba Xefe Estadu atu deside “destinu” governu Aliansa Mudansa ba Progresu (AMP) ne’ebé forma husi CNRT, PLP, no KHUNTO.

Opsaun Eleisaun Antesipada (EA) ne’ebé sai preokupasaun ema lubuk nian sei sai nafatin alternativu karik laiha solusaun seluk ne’ebé bele hetan.

PD deklara prontu atu kumpri kualker desizaun PR Lu Olo, maibé ba EA, PD husu atu opsaun refere tenke sai rekursu ikus liu.

“Se karik Prezidente Repúblika foti desizaun ba eleisaun antesipada PD laiha rezerva, se karik mós presiza sakrifika aan tan dala ida PD sempre dehan katak laiha rezerva atu sakrifika ba Timor Leste, saida de’it.”

“Maibé atu dehan katak eleisaun antesipada ne’e tenke rekursu ikus liu, tanba multi partidaria tenke hatene jere, laiha ema ida ba fila fali eleisaun antesipada atu maiória absulta, entaun tenke haree,” deklara Prezidente PD Mariano Assanami Sabino hafoin ekontru iha PR Lu Olo iha palasiu prezidensial, Bairro-pite, Kuarta (29/01).

Tan ne’e, tuir Assanami, di’ak liu mak oinsa buka dalan hodi sai husi impase politika.

“Di’ak liu mak diálogu nasional, tuur hamutuk rona malu tau enerjia hamutuk ba konstrusaun estadu no konstrusaun nasaun,” nia dehan.

Hatan kona-ba karik mosu koligasaun foun, Prezidente PD ne’e dehan PD prontu ba kualker obsaun.

“PD ba Timor ne’e dehan sakrifisiu mós nia prontu ne’e, sa tan ba koligasaun de’it ne’e la prontu?,” nia dehan.

Iha tempu ne’ebé la hanesan, Prezidente PUDD Antonio de Sá Benevides hatete, nia parte entrega tomak ba PR Lu Olo atu deside.

“Ami hatete ba PR katak kualkér desizaun ne’ebé PR foti ida ne’e mak ami-nia opsaun. PR bainhira hatete ba eleisaun antisipada, 24 oras PUDD sempre atu atende, tanba ami kaer hela prinsipiu ida, PR nia desizaun mak ami-nia opsaun, ami prontu kualkér tempu atu simu,” Antonio hatete.

Maske nune’e, nia hatete, PUDD prefere liu ba dialogu ne’ebé beibeik no intensive hodi buka solusaun ba problema ne’ebé daudauk ne’e mosu.

“PUDD kaer lia-fuan husi PM sempre hatete “iha kadiadu, iha xave, iha problema, iha solusaun”. PUDD aumenta tan, ohin PUDD mós esplika ba PR, importante de’it mak tenke kadiadu ne’e kadiadu boot rezolve ho xave boot, kadiadu kiik, xave mós kiik, ida ne’e mak PUDD fo hanoin fila fali ba PR”.

Tuir nia, sei sedu tebes bainhira koalia kona-ba obsaun EA, tanba daudauk ne’e sei iha hela faze dialogu.

“Eleisaun antesipada mak di’ak liu ka la di’ak liu, ne’e terlalu prematur. Agora ne’e fokus didi’ak diálogu, konsentra diálogu, diálogu ho verdadeiru ne’e mak importante liu,” dehan Prezidente PUDD ne’e.

Rate this item
(0 votes)

Independente Digital TV