Print this page

Rezultadu Teste: Suspeitu COVID-19 Na’in Lima Negativu Featured

By Marsu 24, 2020 3568
Ministra Saude Interina halo konferensia imprensa. Ministra Saude Interina halo konferensia imprensa.

DILI:Ministériu Saúde anunsia ba públiku katak resultadu kazu ema suspeitu ba infesaun Coronavirus na’in lima (5) ne’ebé haruka amostra ba Australia hodi halo konfirmasaun ba teste nia rejultadu negativu.

Resultadu ida ne’e, signifika katak pasiente ema na’in lima ne’ebé sente sintomas infesaun laiha Coronavirus.  

MS deklara, suspeitu na’in lima ne’e livre husi sintoma viruscorona, katak too oras ne’e Timor-Leste seidauk identifikadu afeita moras coronavirus.

Ekipa Médika ne’ebé akompaña no monitoriza pasiente na’in lima desidi ona atu fó alta sira husi kuarentena tanba sira nia kondisaun di’ak no rekupera ona husi sintomas klíniku.


“Ikus mai, hau hakarak informa mós ba populasaun Timoroan tomak katak Timor-leste ne’ebé iha ona kazu ida ne’ebé konfirmadu sabadu semana kotuk, pasiente ne’e kontinua halo tratamentu médiku no nia kondisaun to’o agora kontinua estável,”dehan Ministra Saúde Interina, Elia dos Reis Amaral iha konferensia ba imprensa, tersa-feira ohin.

Tanba ne’e, nia apela ba povu atu mantein kalma la bele paniku, pratika higiene pesoal no fase liman ho sabaun bebeik, labele kaer liman no maintéin distansia ema ida dook metru ida, trin hahan (na’an) no halo tasak didiak, karik iha ema ruma mak hetan sintomas isin manas, mear no susar dada iis, kontaka liña aberta COVID-19 númeru 119, no hatene lalais kedas autoridade saúde iha aeroporto, portu no fronteira, nomós iha Sentru Saúde ka Klínika husi área geográfika;

Ba fatin públiku ka privadu inklui institiusaun estadu, eskolas no Universidades, fasilidades Saúde no klínikas, hotéis no restaurantes, merkadu lojas no kios, terminal karreta ka mikrolet  atu atensaun ba distansia sosial, higiene no limpeza, prepara fatin ida ho bee mós i sabaun atu klientes ka funsionárius sira bele uza.

Rate this item
(0 votes)
Jose Sarito Amaral

Latest from Jose Sarito Amaral