Aktu ne’e profesór MCB halo ba estudante sira bainhira tama aula iha loron Sábadu (1/7).

Domingos Agostu, aman husi alunu vítima hateten, agresaun fíziku uza fiu ne’e profesór halo beibeik ona, maibé inan-aman sira la brani halo keixa tanba ta’uk eskola hasai sira nia oan, entaun profesór hanoin hahalok ne’e di'ak.

Ne'e duni, iha Sábadu foin lalais ne’e, profesór MCB kontinua tan uza fiu mutin boot eletrisidade nian hodi halo agresaun fíziku baku estudante sira. Akontesimentu ne’e rezulta alunu na’in tolu, feto ida no mane na’in rua.

Entre vítima sira ne’e, ida mak Agostu nia-oan ho naran Del Piero, ne’ebé hetan aleija iha parte kotuk.

“Ha’u nia oan oras ne’e hetan aleija. Nia kotuk kanek bubu no metan. Ha’u hato’o ona keixa ne’e ba iha Ministériu Edukasaun Distritál para bele prosesa profesór ne’e”, tenik nia, via telefone, horisehik.

Hafoin agresaun ne’e Del Piero hetan tratamentu iha klínika Balibó, maibé oras ne’e oras ne’e fila ona mai uma tanba parte médiku iha klínika refere la deteta perigu ida ba vítima.

Maski nune’e, família tenke fó ai-moruk nafatin ba vítima to’o ninia kondisaun normál.

Entretantu, Deputadu Bankada FRETILIN, Eládio Faculto hateten, kuandu profesór ida mak halo ona agresaun fíziku hasoru alunu sira perante iha eskola tenke halo ona medida ruma.

“Kuandu iha motivu violénsia duni prosesu tenke aplika duni”, dehan nia.

Ne’e duni, nia husu ba Ministériu Edukasaun tenke bolu ona profesór ne’e para bele halo investigasaun hodi hatene loloos motivu husi akontesimentu ne’e.